KTV bar sa Mandaue gipasirad-an ni Cortes

CEBU, Philippines - Usa ka KTV bar ang gipasirad-an ni Mayor Jonas Cortes  diha sa dalan A.C. Cortes sa barangay Guizo sa dakbayan sa Mandaue tungod sa pag-operate niini nga way business permit ug naronda usab sa Anti- Human Trafficking Task Force tungod sa pagpatrabaho og menor de edad.

Ang kamandoan nga pagpatak-op sa maong balay kahilayan nga giluwatan ni Cortes base sa rekomendasyon sa legal office sa dakbayan nga maoy gitahasan sa paghimo og pakisusi niadtong Septiyembre 13  niining tuiga.

Si Frank Guilena nga maoy community legal officer sa maong dakbayan nga nahinabi sa Banat News miingon nga ilang nasuta nga wala kini business permit. Nasuta usab nga  gironda kini sa Regional Anti Human Trafficking Task Force inubanan sa mga sakop sa International Justice Mission (IJM)  tungod sa giingong pagpatrabaho og mga menor de edad.

Si Purisa Pabuac nga maoy community coordinator sa CSWS nga nahinabi sa Banat News mikumpirmar nga gironda ang maong bar sa kapolisan ug IJM uban sa mga social welfare personnel sa dakbayan ug mga sakop sa kapolisan. (/EIM) (BANAT NEWS)