Mga imnanan duol sa eskuylahan 4 na lang ka oras pabaligyao’g bino

CEBU, Philippines - Mga balay patigayon sama sa bar ug imnanan nga nahimutang duol sa mga tunghaan tugotan lang nga makabaligya og ilimnon nga makahubog gikan sa alas- diyes sa gabii ngadto sa alas-dos sa kaadlawon sugod karong Oktobre 1.

Mao kini ang gipahibalo sa kadagkoan sa Cebu City Liquor Licensing Commission atol sa miting nga ilang gipatawag kagahapon sa mga tag-iya ug sa mga representante sa lainlaing balay-patigayon nga namaligya og ilimnong  makahubog duol sa mga tunghaan.

Ang City Ordinance 1413 nagdili sa pagpamaligya og ilimnong  makahubog sulod sa usa ka gatus ka metros gikan sa mga ospital, public plaza ug mga tunghaan. Giangkon hinuon ni Monsenyor Achilles Dakay, pangulo sa Liquor Licensing Commission, nga angayan nang usbon ang maong ordinansa.

Matud ni Dakay nga ang pagdili sa pagbaligya og ilimnon nga makahubog ibasi na lang sa oras ug dili pinaagi sa gilay-on tungod kay pwerteng daghana nga balay-patigayon nga maapektahan kay nagkatag-katag man ‘sab ang mga tunghaan.

Si Tito Avila, konsehal sa barangay Kamagayan ug adunay balay-patigayon diha sa eskina Sanciangko ug Pelaez nga namaligya og ilimnon nga makahubog miingon nga dili siya makapasalig nga matuman g’yud nila kining maong lagda.

Ang mga tag-iya ug representante sa mga balay-patigayon miingon nga makasinati gyud sila og dakung alkanse niining ipatuman nga “experimental” nga pagtugot lang kanila nga upat ra ka oras ang pagbaligya og mga bino ug beer.

Giangkon sa mga tag-iya og bar, bisan sa mga convenient stores, nga ang halin nila gikan sa bino ug beer, daku kaayo og matampo sa ilang halin.

Si Mayor Michael Rama miinsistir nga ipatuman g’yud ang mga lagda sa ordinansa kay aron kaprotehean ang mga tinun-an nga mobiya sa ilang mga klase ug manulod sa mga imnanan.( /EIM) (BANAT NEWS)