Illegal recruiter na-entrap sa NBI

CEBU, Philippines - Usa ka gidudahang illegal recruiter ang gisikop sa mga sakop sa National Bureau of Investigation (NBI)-7 niadtong Martes sa hapon sa Sangi, Minglanilla.

Sumala pa ni NBI Regional Director Antonio Pagatpat  nga ang maong operasyon gihimo tungod sa reklamong naabot sa ilang buhatan nga gisang-at nila ni Jennifer Brioso, Michelle Enguio, Ciriaco Asumbrado, Jr. ug Gerald Ian Alcover.

Base sa ilang complaint, si Pagatpat mibutyag nga gi-recruit sila sa usa ka Kirby Gonzales Racaza-Silva sa Intertech 888 aron daw patrabahoon sa abroad isip production workers sa Australia.

Gipasaligan silang magdawatan sila og sweldo nga Aus$5,000 hangtud Aus $6,000 kada buwan ug libre na ang board and lodging sud sa unang tuig, ang kontrata matud pa molanat og upat ka tuig.

Dugang pasalig nga ang tiket giingong abagahon na sa employer padung sa Australia, apan aron maproseso ang ilang mga dokumento gipangayoan sila sa suspek og P20,000 isip assessment fee.

Apan matod ni Pagatpat nabalaka ang mga reklamante tungod kay nakahatag na sila og tag P10,000 apan wala pa gihapon lihoka ang ilang mga papeles.

Sa gihimong pagsusi diha sa Philippine Overseas Employment Administration (POEA), nasuta nga walay lisensya si Silva aron mo- recruit  ug mo- deploy og mga trabahante sa abroad.

Tungod niini usa ka entrapment operation ang gihimo ug gipan-an ang suspek sa balanse sa mga biktima  nga sila si Enguio, Asumbrado ug Alcover.

Ang entrapment operation nahitabo diha sa Unit 2 ug  3, 2nd Floor sa GEE-ANN Arcade, Sangi, Minglanilla. (BANAT NEWS)