Mga brgy. gisingil na sa Comelec sa election fund
CEBU, Philippines - Gipahibawo sa Provincial COMELEC Office nga kadaghanan sa mga barangay sa probinsiya sa Sugbo wala pa makahatag og pundo sa ilang buhatan isip ayuda alang sa umaabot nga barangay election sa Oktubre 28 ning tuiga.
Sumala pa ni Arthur Patiga sa Provincial COMELEC Office nga kapin sa 90 porsiyento sa mga barangay sa kalungsoran ug component cities sa lalawigan ang wala pa makahatag sa P10 mil nga augmentation funds isip counterpart sa barangay ngadto sa COMELEC.
Sigun pa niini pulos lamang mga saad ug pasalig ang nakuha gikan sa mga opisyal sa barangay sa mga kalungsoran ug component cities.
Hinuon ang Provincial COMELEC office nagpadayon sa pagpaabot sa nahisgutang pundo gikan sa matag barangay .
Kini samtang dili pa mohimo og legal nga lakang ang ilang buhatan batok sa mga kadagkuan sa mga barangay sanglit gimandato man kini sa balaod sa election ang paghatag sa barangay og augmentation fund sa Comelec.
Nasayran nga mokabat sa 1,203 ka mga barangay sa 53 ka mga lungsod ug 9 ka component cities maoy gipaabot sa Comelec nga mohatag sa nahisgutang pundo alang sa katumanan sa umaabot nga barangay election. (BANAT NEWS)
- Latest
