CFI Coop di mawagtang sa Kapitolyo

CEBU, Philippines - Giklaro sa mga sakop sa hunta probinsiyal nga ang kagamhanan sa lalawigan sa Sugbo walay tinguha nga wagtangon ang Cebu CFI Community Cooperative sa Kapitolyo.

Sigun pa ni Provincial Board Member Peter John Calderon nga walay rason nga mabalaka ang CFI Community Cooperative sa pagtuki sa hunta probinsiyal sa dugay nang naaprobahan nga Memorandum of Agreement tali sa Kapitolyo ug sa nahisgutang kooperatiba.

Nasayran  nga  sa maong MOA gitugotan   nga mahimong direktang makuha  ang bayad sa loan ug sa binulan nga contribution sa mga membro gikan sa suweldo  sa mga kawani niining membro. Kini tungod kay ang tinguha sa Kapitolyo mao ra ang pagbag-o  sa payroll system sa mga kawani sa Kapitolyo.

Miingon si Calderon nga tuyo sa namunuan karon sa Kapitolyo nga mas masayon ang pagdumala ug pagpagawas sa suweldo sa mga kawani nga aduna pay mahibilin  sa matag kinsenas.

Gihangyo ni Calderon nga dili lamang unta mopahayag ang mga kadagkuan sa CFI nga wagtangon na kini sa Kapitolyo kay maghatag kini og kabalaka sa mga membro  niini nga kasagaran mga kawani sa gobiyerno.

Gibutyag usab niya nga gihimo karon sa mga sakop sa hunta probinsiyal sa pag-review sa Memorandum of Agreement sa Kapitolyo ug CFI niadtong tuig 1987 aron  malangkat ang pipila ka probisyon sa maong kasabutan nga dili na magamit niining panahona. (BANAT NEWS)