25 mil ka pamilya napasug-an ni Rama
CEBU, Philippines - Miabot na og kapin sa 25,000 ka pamilya ang nakabenepisyo sa “Let There Be Light†program sa administrasyon ni Mayor Michael Rama.
Ang programa nga Let There Be Light mao nga ang mga pamilya kang kansang kabalayan wala makonektahi og kuryente sa Visayan Electric Company (Veco) hatagan og electrical permit nga dili kuti-kutihon.
Matud ni Atty. Collin Rosell, ang pangulo sa Division for the Welfare of Urban Poor (DWUP), nga gikan kaniadtong Enero 1, 579 ang ilang na-process nga mga dukomento.
Nabantayan sa Banat News nga nagkagamay ang gidaghanon kay halos tanan na sa mga wala makaangkon og kaugalingong kuryente natauran na, gawas niadtong wala gayo’y ikabayad.
Bisan tuod og wala makaabot og P200 ang bayranan nga electrical permit sa City Hall apan mogasto gihapon ang magpataud og kapin sa P3,000 ngadto sa mga electricians nga motaud sa electrical wiring sa ilang balay.
Ang VECO igo ra nga motaud sa electric meter nga giandam na daan sa mga private electrician nga accredited sa ilang opisina.
Matud ni Rosell nga ang programa sa administrasyon ni Mayor Rama nakahatag og trabaho sa mga electrician.
Si Rosell miingon nga kay ang mga pamilya aduna nay kuryente nagpasabot nga makahimo na sila og mga panginabuhian sa ilang tagsa-tagsa ka panimalay bisan panahon sa gabii. (BANAT NEWS)
- Latest
