Bana giluba angol sa asawa

CEBU, Philippines - Si PO1 Melvin Pelayo sa kapolisan sa Presinto 5 sa Mandaue City Police Office (MCPO) nga nagbase sa barangay Opao  miila  sa  biktima nga mao si Alejandro Comendador, 54, minyo,  ug ang suspetsado mao  ang  iyang  asawa  nga  si  Benvineda, 46,  pulos nagpuyo sa maong dapit.

Matud pa ni PO1 Pelayo nga nangayo og sigarilyo ang biktima sa iyang asawa, apan  giingong wala  kini  mohatag   nga maoy hinungdan sa pag-ulbo sa mainiton nilang  lalis.

Dugang pa ni  PO1 Pelayo  nga  dihang  nahutdan  na  og  katarungan  ang  asawa  mikuha  kini  og  kutsilyo  sa  ilang  kusina  dayon  giduslak  niini  ang biktima.  Si PO1 Pelayo miingon nga nasabak  sa  ubos  sa suwang  ang  biktima kay kun  wala  pa  kini  makalihay og  gamay  sigurado  nga matuhog  ang sentro sa   iyang  liog.

Giusban pa paghansak  sa asawa  ang  bukobuko  sa biktima  apan  abtik  kining  nakadagan busa nakaikyas  kini  gikan sa tinong  kamatayon.

Miadto  kini  sa silingan  ug  nagpahatud ngadto  sa  Mandaue City Hospital.

Apan   gibalhin kini ngadto sa Vicente Sotto Memorial Medical Center sa dakbayan sa Sugbo.

Si PO1 Pelayo miingon nga nadakpan hinuon nila ang suspetsado ug temporaryo kini nilang gibalhog sa ilang detention cell.Gipaabot  nila kun mopasaka ba gayod og kaso ang biktima ngadto sa hukmanan  batok  sa  suspetsado. (BANAT NEWS)