Lapulapu College building magamit na

CEBU, Philippines - Ang bag-ong edipisyo sa Lapulapu City College  (LCC) puwede na  nga magamit sunod semester.

Kini ang giluwatang pamahayag ni Lapulapu City Mayor Paz Radaza sa pakighinabi sa Banat news.

Matud pa ni Mayor Radaza kompleto na ang dos andana nga edipisyo nga gitukod sa kagamhanang lokal sa dakbayan sa Lapulapu  didto sa Brgy. Babag.

Midugang  ang  mayor  nga   ang pagbutang na lang sa mga suga ug koral palibot sa maong tunghaan ang kulang niini.

Gumikan niini pwede na kining magamit sa umaabot nga 2nd semester sa bulan sa Nobiyembre o sa sunod tuig tingtungha. Ang maong edipisyo adunay 14 ka lawak nga  klasehanan  ug luag nga lugar alang sa mga tinun-an .

Dali ra  kaayo kining matultolan kay nahimutang kini daplin sa dalan.

Samtang gipadayag ni Mayor Radaza nga nangita pa siya og ikahulip ni Atty. Tomas Ramos nga miluwat sa  katungdanan human kini   nalambigit sa pipila ka issue sa maong tunghaan.

Si Dr. Faustina Atillo nga kasamtangang OIC President sa LCC ,  usa  usab  ka over qualified na gumikan sa iyang pangidaron hinungdan nga iya kining hulipan.

Pangitaan usab og paagi ni Mayor Radaza nga madugangan ang mga magtutudlo sa maong tunghaan nga kwalipikado sa mga kursong gitanyag niini.

Ang LCC adunay 3 mil kapin ka mga tinun-an nga  anaa sa kabus nga panginabuhi nga dili makagahum sa pagtungha sa mga dagkong unibersidad apan may  salabotan  nga  lantip.  (BANAT NEWS)