Nag-atang og PUJ gitulis

CEBU, Philippines - Mga  personal  nga  butang  ang  natulis sa armadong mga lalaki nga nagsakay og motorsiklo  gikan  sa babaye ug lalaki nga nag-atang  og  PUJ  didto sa M.C. Briones sa barangay Ibabao Estancia sa dakbayan sa Mandaue alas 10 pasado ang takna sa miaging gabii.

Ang mga biktima mao sila si Richard Collantes Cuasito, 27, ulitawo,  nga taga barangay Canduman sa maong dakbayan ug Margie Cariaga, 23 , dalaga nga taga Bag-ong Dalan, barangay Poblacion sa lungsod sa Liloan.

Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) nga nagbase sa barangay Centro nga nahinabi sa Banat News miingon nga nagkatupad lang sa pagbarog ang duha ka biktima sa daplin sa karsada sa maong dapit.

Samtang  nagpaabot   og  PUJ kalit lang   mihunong  sa  ilang  atubangan  ang  usa  ka  motorsiklo nga giluwanan sa tulo ka wala hiilhing armadong mga lalaki.

Gitionan  dayon  sila sa armas nga wala matino ang kalibre dayong deklarar   og tulis  ug mapugsanong gipangayo ang ilang mga bag,  pitaka, cell phone ug mga alahas.

Matud pa ni PO2 Lutchavez nga ang sulod sa shoulder bag ni Cariaga  mao ang lipstick, ATM card ug ID card  sa gitrabahoan niining kompaniya  ug  nadala sa mga tulisan.

Dugang pa niya nga human makuha  ang  maong  bag  ug  mga  butang,  mipabulhot  dayon sa ilang  sakyanan  ang  maong  mga  tulisan  subay sa dalan U.N. Avenue sa Marcelo Fernan Bridge ug ilang gituohan nga padulong kini sa dakbayan sa Lapulapu.  (BANAT NEWS)