Mga brgy sa Mandaue mihatag P10 mil sa Comelec

CEBU, Philippines - Nagsugod na sa paghatag sa ilang cash contribution ang mga barangay kapitan sa dakbayan sa Mandaue ngadto sa buhatan sa Commission on Election (Comelec) isip  abag sa galastohan sa election  sa barangay sa  Oktobre 28, 2013.

Si  Atty. Fleur Ann Gujilde, Comelec officer  sa Mandaue  mibutyag  kagahapon  sa  Banat News  nga P10,000 nga kantidad sa tseke   nga ilang nadawat gikan sa barangay Subangdaku sa maong dakbayan nga maoy labing unang nakahatag niini.

Dugang pa niya nga  may dugang pang pito  ka barangay   ang  mohatag  karong semanaha sa mao  gihapong  kantidad.

Si Kapitan Nelson Rubio sa barangay Umapad sa maong dakbayan nga nahinabi sa Banat News miingon  nga gikan sa ilang pundong salapi sa barangay ang P10,000  nga ilang gihatag ngadto sa Comelec.

Gitataw niya nga  ang  ilang  paghatag niini ilang gibase  sa Comelec resolution nga nagmando kanila sa paghatag sa maong kantidad aron  ikatabang  nila  sa  galastohan sa umaabot nga piniliay sa Oktubre 28 niining tuiga.

Si Atty. Gujilde mipasabot nga ang maong kantidad nga ilang madawat gikan sa 27 ka barangay sa dakbayan maoy ilang kuhaan sa honorarium sa mga magtutudlo nga moserbisyo sa nahisgotang piniliay.

Si Atty. Gujilde miingon nga kun kuwangon man ugaling ang maong kantidad nga ilang madawat sa gihapon ilang ipadangat ngadto sa ulohan nilang buhatan aron  makapangita og paagi sa pagdugang niini.  (BANAT NEWS)