Driver giatake sa alta presyon patay

CEBU, Philippines - Namatay  ang  usa  ka  drayber  sa  traysikol human  kini  atakeha  sa high  blood  samtang  nagpaabot  og  pasahero didto  sa parkinganan  sa  lungsod sa Compostela  sa miaging  adlaw.

Si PO2 Roselo Campo sa kapolisan sa maong dakbayan miila sa namatay nga mao si Aljerico Capua Sr., 53, minyo nga nagpuyo sa barangay Guimbal sa lungsod sa Compostela.

Matud pa ni PO2 Campo nga miapil  sa linya sa  mga traysikol  si  Aljerico   nga nagpaabot og pasahero.

Apan  nahibulong ang mga nagsunod  niya  kay wala na man moirog ang traysikol nga gidala niini  aron  mosunod  sa linya.

Unya  gibosenahan  pa  gani  sa ubang  mga  drayber  apan wala na moabante   ang  traysikol  sa biktima  busa  giduol   kini  sa ubang  mga  drayber  ug  didto  nasayran  nga nawad-an  kini sa panimuot  samtang nag-akbo sa manobela.

Si PO2 Ocampo miingon nga dali kining gihatod sa mga kauban  ngadto sa Danao Provincial Hospital sa maong dakbayan apan gideklarar kini sa mga doktor nga dead on arrival.

Gituohan  nga  giatake  kini  sa high  blood  o kaha  sa kasingkasing  hinungdan  sa hinanaling  kamatayon  sa  biktima.  (BANAT NEWS)