Adbokasiya batok sa kanser sa dughan ipatuman sa Oktobre
CEBU, Philippines - Tambayayongan sa kagamhanan ug sa Ramon Aboitiz Foundation INC (RAFI) ang usa ka hinugpong nga lakaw sa mga kababayen-an ug sa ilang pamilya unya sa Oktobre 19, 2013 dinhi sa dakbayan sa Sugbo.
Ang maong lakaw gitakda nga manukad sa Fuente Osmeña paingon sa Plaza Independencia, diin matag usa nga mosalmot giawhag nga magsul-ob og pink nga kolor sa senina. Usa kini ka proyekto usa sa pagpakabana batok sa sakit nga kanser sa kababayen-an.
Si Hannah Aranas tigpamaba sa RAFI mibutyag nga base sa ilang record mikabat sa 657 ang namatay sa 1,349 ka kaso sa breast cancer niadtong 2003-2007 nga pulos mga Sugboanon.
Kini tungod kay matud ni Aranas ang breast cancer maoy nag-unang hinungdan sa kamatayon kasagaran sa mga babaye sa Sugbo.
Gumikan niini ilusad ang ika-10 nga dagan sa Moonwalk:: alang sa breast cancer awareness sa Oktobre 19. Sa miaging tuig mikabat sa 3,000 ka tawo gikan sa nagkalainlaing sector sa komunidad nga Sugboanon ang misuporta ning tinuig nga gimbuhaton atol sa pagtakdol sa buwan sa Oktobre nga maoy pagsaulog usab sa Breast Cancer Awareness Month.
Tungod niini ang RAFI miawhag sa publiko nga manginlabot niining maong proyekto pinaagi sa pagsalmot sa lakaw karong Oktobre 19 gikan sa Fuente Osmeña Circle paingon ngadto sa Plaza Independencia. Ubanan usab kini og mga pasundayag sa banda nga Sugboanon uban usab sa mga performer niini.
Ang Moonwalk: A Walk for Breast Cancer Awareness usa ka talagsaon nga adbokasiya nga mopunting sa sayo nga pag-ila sa breast cancer pinaagi sa binuwan nga pagpa-eksamin ug mammography, ilabi na sa mga babaye nga nagpangidaron og 20 anyos paubos. Gawas sa kagamhanan sa dakbayan sa Sugbo, moduyog usab niini ang Task Force Cancer of Cebu City, Cebu Cancer Fight Inc., I CAN SERVE Foundation, She Matters, and CAN with GOD. (/WC) (BANAT NEWS)
- Latest
