Motorsiklo napasok sa giparadang trak

CEBU, Philippines - Patay ang usa ka lalaki samtang kritikal usab ang kuyog niining babaye human midaro ang ilang gisakyang motorsiklo ngadto sa 10-wheeler truck diha sa barangay Don Andres Soriano dakbayan sa Toledo.

Ang namatay nga biktima nailhan nga si Kemp Panimdim, 23, samtang ang kauban niining kritikal nailhan usab nga si Leonora Albano, 25. Matud pa ni PO3 Alexander Dimco sa Toledo City Police Station nga nahitabo ang aksidente pasado alas-7 samtang ang duha gikatahong patubang na nga mouli sakay og motor nga gimaneho sa namatay.

Gikatahong wala makabantay sa giparada nga 10-wheeler truck si Panimdim diha sa daplin sa dalan. Ang maong dumptruck gimaneho sa usa ka Ernesto Milagro.

Matud pang Dimco walay early warning device (EWC) ang maong truck nga unta usa man kini sa mga rekisitos sa pagpa-rehistro sa mga sakyanan. Ang duha gidala sa tambalanan apan si Panimdim nakabsan gyud sa kinabuhi samtang si Albano gidala   sa usa sa mga tambalanan sa siyudad sa Sugbo.

Pahimangno usab ni Dimco ngadto sa mga motorista ilabi na niadtong moparada sa daplin sa dalan sa bisan unsang rason nga magbutang gyud og early warning device (EWC) aron dili makadisgrasya sa uban. (/EIM) (BANAT NEWS)