Konsehal sa Mandaue nabalaka sa mga liki sa Maguikay flyover

CEBU, Philippines - Gikabalak-an karon ang mga liki sa flyover sa Maguikay sa dakbayan sa Mandaue nga nakaaghat kang Konsehal Editha Cabahug sa pagpalabang og resolusyon nga nag-awhag sa buhatan sa Department of Public Works and Highways (DPWH) 7 sa paghimo og ocular inspection.

 Si Konsehal Cabahug sa iyang resolusyon mipasabot nga personal niyang naobserbahan ang nasinati nga pagpangliki sa pipila ka bahin sa nahisgotang flyover nga nakapatumaw sa iyang kabalaka nga maoy nakaaghat kaniya sa pag-awhag sa buhatan sa Department of Public Works and Highways - 7 sa paghimo niini og pakisusi.

“This resolution is not meant to panic or any unnecessary statements that the said structure is in danger of collapse,” nagkanayon si Konsehal Cabahug sa iyang resolusyon.”The intention of this resolution to have the technical expert of DPWH 7 with the coordination of similar agencies of Mandaue City, to conduct an immediate safety and technical inspection  and repair if necessary.”

Ang pagpangliki sa pipila ka bahin sa Maguikay flyover ang gikumpirmar usab ni Engineer Danilo Pasicaran nga maoy chief sa structural section sa DPWH 7 dihang  nahinabi sa Banat Manobela.

Matud pa niya nga gihimo na nila ang pakisusi ug personal nilang nakita ang mga liki sa pipila ka bahin sa estraktura apan iyang gipaniguro nga lig-on pa kini ug dili  kuyaw nga mahugno. Si Engineer Roy dela Cruz nga maoy in-charge sa construction section sa DPWH 7 nga kauban ni Engineer Pasicaran sa paghimo og pakisusi sa nahisgotang flyover miingon nga  wala’y angay kahadlokan nga mahugno ang maong flyover sa gihapon moduso sila og rekomendasyon sa ilang kadagkoan nga himoon pa ang higpit nga pakisusi ug himoon ang pag-ayo sa pipila kabahin niini.  (BANAT NEWS)