Homeowners sa Bulacao mihangyo access road ilang bayran

CEBU, Philippines -  Ang mga membro sa sitio Mahayag Homeowners Association sa barangay Bulacao, dakbayan sa Talisay mihangyo sa kagamhanan sa siyudad nga paliton nila ang road-right-of way  sa ilang lugar aron dili sila mangatanggong.

Nangayo   sila  og tabang  kang barangay kapitan Marieta  Bucao aron mapaabot ngadto sa mayor ang ilang yangongo.

Kay  gusto  nila nga unta ang siyudad  maoy  makigsabot  sa tag-iya sa lote  nga  ilang  gipuy-an   ug paliton ang 45 metro  kuwadrado  nga  bakante  aron himoon  nilang  access road  nga  kaagian.

Ang mga residente una kining nangayo og panabang sa barangay nga mapalit unta ang maong lote apan gibalibaran  sila  sa  kapitan  tungod  kay  walay  dakong  pundo  ang  barangay  alang  sa maong katuyoan.

Kini  kay  matud  pa  ni  kapitan  Bucao,  sa tag  P4,000 matag metro  kuwadrado mokabat  sa  P150,000 ang kantidad sa  maong  lote.

Sa suwat ni Bucao ngadto kang Mayor Johnny De los Reyes,  mitug-an  kini  nga limitado kaayo ang ilang pundo sa barangay ug dili nila maabot ang pagpalit sa lote.

Ang mga residente sa lugar nagkanayon nga naapiki sila sa ilang pag-agi sukad gipakoral sa tag-iya sa lote ang ila untang agianan.  (BANAT NEWS)