4 naghantak nasikop sa kapolisan

CEBU, Philippines - Upat ka mga suspetsadong sugarol ang nasikop sa kapolisan  sa merkado publiko sa barangay Tabunok, dakbayan sa Talisay  sa miaging  Biyernes sa gabii.

Si Senior Inspector Al Pascual, deputy sa Talisay City Police Station mibutyag kagahapon nga nakadawat sila og report gikan sa residente sa lugar  bahin sa mga naghantak hinungdan nga girespondihan dayon nila kini.

Nasikop sa mga polis sila si Rudy Macabale, Archie Camay, Julius Rodriguez ug Junclive Ventic, pulos hingkod, ug mga residente sa barangay Linao, Talisay, Inayawan, Pardo, dakbayan sa Sugbo, Tabunok, Talisay ug Lagtang, Talisay  ang  matag  usa.

Naimbargo sa mga polis gikan sa mga suspetsado ang pusta  nga P25, tulo ka antugon  ug nagkalain-laing tip sheet sa masiao gikan kang Macabale.

Ang upat nagtingkagol  karon sa Talisay City detention cell ug gitakdang pasakaan og tukmang kaso karong Lunes sa nahimo nilang kalapasan.

Si Pascual mibutyag  nga sulod sa usa ka buwan niining tuiga kapin  na  sa 20 ka mga suspetsado nga nalambigit sa nagkalain-laing ilegal nga sugal ang ilang nasikop.

Ang maong sugal gilangkuban sa hantak, tong-its, baraha ug masiao.  (BANAT NEWS)