Kapitan sa Kamagayan gisuspenso sa Ombudsman

CEBU, Philippines - Gisuspenso sa Office of the Ombudsman-Visayas ang kapitan sa barangay Kamagayan sud sa lima ka buwan nga way sweldo human makitang sad-an sa kasong administratiba nga simple misconduct tungod sa pagpanumbag. Si graft investigation and prosecution officer Darius Sagadal nagkanayon nga nakakita siya og igong ebidensya batok kang Celestino Avila nga gireklamo ni Orlando Adarne.

Basi sa reklamo ni Adarne, nahitabo ang pagpanumbag niadtong Mayo 26 sa miaging tuig samtang siya maoy scorer sa usa ka volleyball game exhibition sa Kamagayan basketball court  alas 8 sa gabii.

Matud pa aksidente naigo og bola si Lope Avila, manghud sa kapitan ug nabuak ang eyeglasses niini. Matud pa nga pagkasayod sa kapitan sa nahitabo gisukmag niini ang nawong ni Adarne sa makadaghang higayon.

Ang kapitan kusganong mihimakak sa pasangil kay matud niya nanihapon ra siya nianang orasa ug gipahibalo na lang sa barangay tanod nga si Rolando Huguete   sa nahitabo sa manghod niini. Matud sa kapitan wa na siya moadto pa sa basketball court pagkahibalong na-settle na kini.

“This office finds substantial evidence to hold respondent administratively liable for simple misconduct,” matud pa sa desisyon.

Gimando usab sa Ombudsman kang Mayor Michael Rama nga ipatuman ang suspension sud sa lima ka adlaw kun madawat niini ang desisyon. (BANAT NEWS)