25 ka official ballots sa clustered precincts gikwestIyon ni Osmeña

CEBU, Philippines - Gikwestiyon ni kanhi kongresista Tomas Osmeña kun nganong ang mga official ballots gikan sa 25 ka clustered precincts dinhi sa dakbayan wala gisulod sa ballot boxes ug didto ra gitipigan sa opisina sa Comelec sulod sa tulo ka buwan.

Matud ni Osmeña nga apil sa maong mga balota ilang giprotestahan ug gitinguha nga iphon pag-usab sa Comelec tungod kay nagduda sila nga dili tinuod nga napilde sila sa maong mga presinto.

Nahibaw-an nga si Osmeña ug kanhi vice mayor Joy Augustus Young miprotesta sa kadaugan nila ni Mayor Michael Rama ug Vice Mayor Edgardo Labella ug ang election protest gitagad na karon sa Comelec First Division didto sa Manila.

Dihang gisukna si Osmeña kun unsa’y posible nga dangatan sa ilang election protest kun mahitabo nga nabinuangan ang maong mga official ballots, wala kaayo ganahi mohatag og tubag si Osmeña.

Si Osmeña nakadawat og suwat gikan nila ni Election Officers Marchel Sarno ug Edwin Cadungog kaniadto lang Septiyembre 3 nga ang mga “scanned official ballots” gikan sa 25 ka clustered precincts nga gigamit sa miaging eleksyon ibalhin ngadto sa city treasurer’s office.

Matud sa duha ka election officers nga ang maong mga official ballots nasayop nga didto madala sa ilang opisina imbes adto unta sa city treasurer’s office. Gikwestyon kini ni Osmeña kun ngano nga gikan sa Mayo, sa Septiyembre 3 pa gitugyan sa Comelec ngadto sa City Treasurer’s Office ang maong mga balota.  (/EIM) (BANAT NEWS)