PAO mipasalig nga tabangan ang mga biktima sa sea mishap

CEBU, Philippines - Andam  sa kanunay  motabang ang Public Attorney's Office kon PAO sa pagtabang sa mga kabanay sa biktima sa MV St. Thomas Aquinas nga gipanag-iya sa 2GO shipping Lines nga gibanggaan sa MV Sulpicio Express Siete nga gidumala sa Philippine Span Asia Carrier Corp. niadtong Agosto 16 ning tuiga didto sa Lawis Ledge syudad sa Talisay.

Sumala pa ni PAO director Atty. Maria Gery Calinawan nga ang ilang buhatan nagpaabot na lamang sa mga paryente ug mga kadugo sa mga namatay ug naangol nga mga pasahero ug mga tripolante sa nalunod nga barko.

Matud pa niya kun gikinahanglanon sa maong mga biktima ang ilang legal nga serbisyo kung makadesider silang mokiha   batok sa duha ka mga shipping companies andam nila sila tabangan.

Bugtong miduaw sa ilang buhatan mao ang mga biktima nga nangunsulta og legal nga kasayoran kung mahimo ba silang makapasaka og kaso.

Kapin sa usa ka gatos ka pasahero ang nakalas samtang kapin sa 20 pa ka pasahero ang missing gikan sa gibanabanang 800 ka pasahero ug tripulante dihang nabanggaan ang MV Saint Thomas Aquinas sa MV Sulpicio Express Siete didto sa kadagatan sa syudad sa Talisay.(/EIM) (BANAT NEWS)