‘Spiderman’ nadakpan

CEBU, Philippines - Human sa kapin sa duha ka buwan nga pagtago-tago nasikop na gyud sa kapolisan niadtong Miyerkules sa alas 11:00 sa gabii diha sa may flyover, barangay Tabunok, dakbayan sa Talisay ang suspetsadong kawatan kinsa mitago kaniadto diha sa kisame sa usa ka mall sa siyudad.

Ang pagkasikop kaniya nahitabo atol sa gipahigayong operasyon sa kapolisan sa Oplan Bakal Sita ug Aggressive Patrolling diin ang maong grupo gipangulohan ni Senior Inspector Al Pascual .

Ang suspetsado giila nga si Manuel Lauza, 25-anyos, residente sa Mansueto Village, barangay Bulacao, Talisay nakaangkon kini og samad pinusilan sa walang bukton ug bitiis human giingong nakigpinusilay sa mga polis.

Si Lauza gi-anggaan sa mga polis ug sa mga tawo nga “Spiderman” tungod sa kamaayo niini pagkatkat ug pagpuyo sa kisame sa usa ka department store sud sa pipila ka mga adlaw una pa kini nabantayan sa mga gwardiya.

Si Lauza daling gidala sa Talisay City District Hospital ug gibalhin usab dayon kini ngadto sa Vicente Sotto Memorial Medical Center. Si Superintendent Resty Santos, officer-in-charge sa Talisay City Police Station mibutyag sa mga tigbalita nga sa wala pa mahitabo ang insidente si Lauza kinsa dunay laing wala mailhing kauban nagbitbit og manok nga para isabong hinungdan nga giduol kini ni PO1 Benedy Solante ug gisita.

Apan giingong mihulbot og pusil si Lauza ug dayon pusil ngadto sa polis maayo na lang nga nakatago dayon sa usa ka poste  ang polis hinungdan nga ang backup niyang si PO1 Ethrol Gamboa ang daling mibawos og pusil kang Lauza.

Matud ni Santos nga si Lauza ug ang kauban niini nagkatibuwaag og karatil og dagan ug naabtan nila si Lauza nga nanuktok sa gate sa balay ni Bokal Julian Daan hinungdan nga ang asawa ni Daan nga si Yolanda daling mitawag og polis tungod kay nahadlok kini.

Si Lauza giingong mikatkat kini sa koral nila ni Daan tungod kay wala kini ablihi dihang nakabantay kining nagpaingon ang mga polis.

Si Lauza diha na masakpi sa mga polis sulod sa compound sa pamilyang Daan. Naembargo sa mga polis gikan kang Lauza ang usa ka kalibre .357 revolver nga dunay tulo ka mga buhing bala nga kalibre .38 ug duha ka kabhang. Gawas niini ang mga polis naka-recover og duha ka mga paketeng shabu gikan sa posisyon sa suspetsado nga nagtago sa tangkal sa iro.

Matud ni Santos nga nahibaw-an nilang si Lauza ang lalaking misaka diha sa kisame sa usa ka mall sa Tabunok tungod sa mga hulagway niining ilang nakuha gikan sa footage sa Close Circuit Television (CCTV) cam sa maong mall. (/EIM) (BANAT NEWS)