Camp Lapulapu pabiyaan sa mga sundawo

CEBU, Philippines - Gusto sa mga sakop sa executive committee sa CITOM nga biyaan sa mga sundalo ang Camp Lapulapu  sa Barangay Apas ug mobalhin sila sa laing dapit.

Si Konsehal Gerardo Carillo nga sakop sa Citom executive committee mipadangat og resolusyon sa konseho atol sa sesyon kagahapon nga nag-awhag sa kadagkoan sa militar nga mobiya sila gikan  sa maong kampo.

Ang rason sa CITOM pag-awhag sa kasundalohan nga mobiya na dinhi sa Sugbo mao nga wala na’y problema sa mga rebelde dinhi sa Sugbo ug ang pagbiya sa mga militar  sa ilang kampo makatabang pagsulbad sa problema sa trapiko.

Si Joy Tumulak nga operations officer sa CITOM miingon nga nahisgutan nila sa miting sa CITOM executive committee ang grabeng problema sa trapiko  sa Governor Mariano Cuenco Avenue.

Ang pagbukas og bag-ong karsada alang sa mga sakyanan nga anha molagbas sa kampo usa sa makasulbad sa problema sa trapiko  sa Barangay Apas.

Ang yuta nga gigamit isip kampo sa militar  sa Barangay Apas iya  sa Kapitolyo apan gidonar  ngadto sa kasundalohan dugay na nga panahon.

Ang kopya sa resolusyon nga giduso ni Carillo ilang ipadala sa kadagkoan sa militar. (BANAT NEWS)