Inter-city route gitinguha sa Mandaue

CEBU, Philippines - Giplano karon sa buhatan sa Traffic Enforcement  Agency of Mandaue (TEAM) nga magbutang og bag-ong rota nga pagatawgon og inter city route nga motadlas sa nagkadaiyang kadalanan sa dakbayan ug molahos na ngadto sa kabarangayan.

Si Edwin Ermac nga maoy pangulo sa nahisgutang buhatan nga nahinabi sa Banat Manobela sa iyang pamahayag miingon nga sa kasamtangan ang maong plano padayon pa nilang gitun-an.

Gitataw niya nga ubos sa maong plano maoy ilang tinguha ang pagpadagan og mga lima ka PUJ nga ang biyahe motadlas sa tanang dapit sa  dakbayan sama sa paglabay sa dagkong mga mall, simbahan ug buhatan sa nasudnong kagamhanan sama sa Bureau of Internal Revenue (BIR) Bureau of Immigration,  (BID) Office of the Foreign Affairs sa Ibabao Estancia ug merkado publiko sa barangay Centro.

Matud pa ni Ermac nga gipadangat na niya ang maong plano ngadto sa nagkadaiyang  kahugpongan sa mga traysikol drayber ug operator ug wala siya makasugat og mga pagsupak labot sa maong plano sa kagamhanan.

Gipasabot niya nga ang pagbutang og inter city route ilang gitumong alang sa paghatag og kasayon sa mga molupyo sa ilang pag-adto sa tanang nga mga dapit niini dili na magbalhin-balhin og laing sakyanan tungod kay malabyan man sa PUJ ang mga buhatan nga buot niining adtuon.

Si Ermac miingon nga ang maong plano kun mahingpit na nila ang pagtuon maoy ilang pagahimoon ang pagsumiter niini ngadto sa traffic board ug kun kauyonan maoy himoon ang pagsumiter  niini  ngadto sa mga sakop sa konseho alang sa pagpalabang og ordinansa.

Dugang pa niya nga ang maong plano sa kagamhanan nga pagbutang og bag-ong rota sa PUJ sa tanang dapit sa dakbayan ilang isumitir sa buhatan sa Land Transportation Franchising and Regulatory Board (LTFRB) 7 alang sa paghatag og tukmang kasayuran nga maoy maghingpit sa katumanan.

Hinuon si Ermac mipasabot nga ang mao nilang plano dili pa kini madali sanglit daghan pa nga mga pagtuon ang ilang pagahimoon sanglit nagkinahanglan man kini og pag-uyon sa tanang sektor sa katilingban. (Romeo T. Limpangog)

4 ka balay natabunan sa midahiling yuta sa Talisay

Upat ka mga balay ang nalubong sa yuta ug laing duha ang na-partially damage human madahilii ug maligdi og bato diha sa sitio Tangub, barangay Lagtang, dakbayan sa Talisay sa milabay’ng semana.

Apan kagahapon lang kini mahibaw-i human nga usa ka residente sa lugar ang mi-report ngadto kang Konsehal Danny Caballero bahin sa nahitabo hinungdan sa pagsusi niini sa lugar.

Nasuta nga ang mga biktima temporaryong gipapuyo diha sa bunk house sa QM Builder nga maoy contractor sa proyekto sa Department of Public Works and Highways (DPWH) nga pagpalapad sa dalan padung sa Toledo.

Ang mga tag-iya sa upat ka mga balay nga natabunan sa yuta mao sila si Irish Marie Baculi, 26, ug maguwang niining si Maylene Baculi, 30, Kristita Vita, 55 ug Agnes Mangcao, 26.

Samtang sa balay nga naligdan sa bato gipanag-iya kini ni Adelina Cabuenas, 53. Ang bato giingong milahos kini ngadto sa kusina sa balay ni Cabuenas.

Samtang natabunan ang kwarto nga gipanag-iya ni Suzette Cancerna. Si Caballero nga nahinabi sa Banat News kagahapon nagkanayon nga sa iyang pakisusi wala hinuoy naangol sa maong insidente.

Ang QM Builder misaad nga sila’y mopaayo sa mga balay nga nangaguba ug bayran sila sa ilang pagkahasol. (BANAT NEWS)