Pamakuna sa HPV gilusad

CEBU, Philippines - Gilusad  kagahapon  sa buntag  sa  kagamhanan  ang unang  higayon  sa pagpatuman  sa  gitawag  nga  school based HPV vaccination (SBAV) dinhi  sa dakbayan  sa Sugbo.

Ang  maong pamakuna  batok  sa  sakit  nga  human  papilloma virus (HPV) didto   ipahigayon  sa Don Vicente  Rama  Memorial Elementary School (DVRMES),  sa barangay  Basak, dakbayan  sa Sugbo.

Duha ka mga tinun-an  sa   maong  tulunghaan  ang  gibakunahan   atol  sa ceremonial launching kon  paglusad  sa  SBAV.

Ang  mga  unang  gibakunahan  mao sila  si Francis Ellain Lota  Reyes, 10, ug Hannah Norin Aguillela, 11,  pulos  Grade V sa  DVRMES , ug  pulos usab  nagpuyo  sa  barangay  Basak.

Sumala  ni Dr. Irma L. Asuncion, OIC Director  IV, sa NCDPC  nga  ang  maong  programa  gilusad  sa kagamhanan   sa  14  ka  eskuylahang  publiko  dinhi  lamang  sa  Metro Cebu  areas.

Matud niya  nga  sa katapusang  semana  sa Septembre  himoon  na  nga  dungan  ang  pagpamakuna  sa mga  5,000 ka  kabataan  nga  una  nilang  na-screen  ug  angay  nga  mabakunahan.

Kini  tungod  kay  may  mga  kabataan  nga  dili  kwalipikado   gumikan sa depekto  sa  ilang  lawas sama  sa hilanat, allergy  ug  uban  pa.

May  mga  ginikanan  usab  nga   wala  mosugot  dihang  gipadad-an  sila  og  consent request  nga  papirmahan  kanila.

Matud  pa  ni  Asuncion  nga  wala  hisayri  kun  unsay  mga  hinungdan  sa pagbalibad  sa  mga  ginikanan apan wala nila  kini  pugsa.

Ang  maong  programa  tinambayayungan sa  pagpatuman sa Department  of Health (DOH) ug sa  Department of Education (DepEd). (BANAT NEWS)