Bana giluba kritikal sa asawa

CEBU, Philippines - Kritikal ang kahimtang sa usa ka bana human kini dunggaba sa iyang asawa  sa ilang  balay  sa  barangay San Roque, dakbayan sa Talisay  niadtong  Lunes  sa gabii.

Ang biktima mao si Carmelito Curib, 42, nagpuyo sa Narlyn Warehouse sa nahisgutang barangay.

Ang  biktima  nakaangkon og samad dinunggaban sa bukton ug dughan  kinsa  daling gidala ngadto sa Vicente Sotto Memorial Medical Center.

Ang suspetsado   mao  usab  si Elvira Curib, 40, asawa  sa biktima  kinsa  boluntaryong mitahan sa iyang kaugalingon ngadto sa mga tanod sa barangay ug gitugyan usab dayon siya ngadto sa mga polis. Lakip nga gisurender sa suspetsado ang duha ka kitchen knife nga parehong dunay 12 ka pulgada ang gitas-on.

 Sa imbestigasyon sa kapolisan  nasuta  nga  ang amo sa magtiayon nga si Jorge Anasco mibutyag nga ang duha kanunay   nga  mag-away tungod kay si Elvira giingong natahap sa iyang bana nga   namabaye.

Sa wala pa mahitabo ang pagpanunggab ang magtiayon nag-away  ug giingong gisukmag ug gipatiran ni Carmelo ang iyang asawa.

Apan misukol si Elvira ug nakahigayon sa pag-ilog sa duha ka mga kutsilyo nga gitakin ni Carmelito  sa iyang hawak.

Giingong si Carmelito mikuha og 2X2 nga kahoy ug gibunal ngadto kang Elvira hinungdan nga ang naulahi nakabaton  og bun-og sa walang bukton.

Apan wala usab magpalupig si Elvira ug mibawos kini og dunggab ngadto sa iyang bana.

Si Elvira nagtingkagol karon sa Talisay City detention cell. (BANAT NEWS)