Sunog miulbo sa T.Padilla usa naangol
CEBU, Philippines - Usa ka sunog ang miigo sa dalan T. Villa sa barangay T. Padilla sa dakbayan sa Sugbo sa alas 8:25 sa buntag kagahapong adlawa. Naugdaw ang upat ka balay ug unom ang nangadanyos dihang miulbo ang sunog sa maong dapit.
Si SFO2 Daniel Relatado Jr. nga nahinabi sa Banat News miingon nga nadawat nila ang maong alarma sa alas 8:25 ug gideklarar nga under control alas 8:42 sa buntag.
Midugang si Relatado nga nagsugod ang sunog sa balay ni Jose Villa nga gipaabangan sa pamilyang Gonzales sa ikaduhang andana.
Wa pa matino ang hinungdan sa sunog apan usa sa gidudahan mao ang faulty electrical wirings.
“Nagluto ko sa ubos sa pagtan-aw nako dako na kaayo ang kayo nagkuha mig balde gibuboan namo og tubig,†matod pa ni Joshua Gonzales.
Si Portia Basmayor ang supervisor sa Department of Social Works and Services sa dakbayan sa Sugbo miingon nga 12 ka pamilya ug 53 ka tawo ang naapektohan sa maong sunog.
Gibana-bana nga mokabat sa usa ka gatos ka libo ka pesos ang danyos sa maong sunog ug usa ang naangol nga mao si Agapito Arnado kinsa napaso sa iyang dughan sumala pa ni fire investigator Fortunato Bucia.
Wa hinoon maglisod ang kabomberohan tungod sa pag-reblocking na sa maong dapit kun itandi sa nanglabay’ng mga insidente sa sunog sa mao gihapong lugar dihang wala pa hingusgi ni Mayor Michael Rama ang reblocking. (BANAT NEWS)
- Latest
