Mga drayber sa PUJ giwarningan bahin sa mga tulisang mosakay kanila

CEBU, Philippines - Gipahimangnoan sa kapolisan ang mga pasahero sa PUJ nga nagbiyahian gikan sa dakbayan sa Lapulapu batok sa armadong mga lalaki nga mosakay  kanila ug  manulis sa mga  pasahero inig-abot  nila   sa Mandaue.

Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) nga nagbase sa barangay Centro nga nahinabi sa Banat News  miingon nga ang armadong mga tulisan nga mosakay sa PUJ gikan sa dakbayan sa Lapulapu   magpakaaron-ingnon  nga pasahero.

Unya  samtang magdagan ang sakyanan  maniid na kining daan sa pasahero nga maoy ilang biktimahon.

Inig-abot  sa dalan A.C. Cortes Avenue o sa B.B. Cabahug sa barangay Guizo, dakbayan  sa Mandaue kalit kining moibot sa armas ug ition  sa  biktima   dayon   modeklarar  og tulis.

Matud pa ni PO2 Lutchavez nga human  makatulis  manaug dayon  kini sa PUJ, dayon  manglakaw  ug  usahay  mosakay  og taxi.

Si PO2 Lutchavez miingon nga tulo na ka mga  pagpanulis sa miaging semana ang  ilang  na-rekord.

Ang labing ulahing biktima mao si Fen Tundag, 44,  taga barangay Cogon sa dakbayan sa Bogo.

Gitataw niya nga nakuha sa biktima ang iyang salapi, alahas  ug mahalon nga cell phone.

 Ang mga biktima sa tulo ka hugna nga  tulis mihulagway  sa duha  ka lalaki nga mao  ray  nagtulis   sa usa  ug  usa  kanila. (BANAT NEWS)