Mi-overtake sa laing motor nabalitok patay

CEBU, Philippines - Patay ang usa ka lalaki human malamba sa sementadong karsada uban sa giluwanan nga motorsiklo dihang kalit lang nga gikasingki ang laing motorsiklo hinungdan sa pagkabalitok niini sa dalan national sa barangay Cotcot, lungsod sa Liloan alas-3 pasado ang takna sa miaging kaadlawon.

Ang namatay mao si Mark Langhay, taga barangay Tayud sa lungsod sa Consolacion ug nagsakay sa iyang Honda XRM nga motorsiklo.

Si Raymond Batiancila Villafranca, taga barangay Poblacion sa lungsod sa Liloan nagsakay usab sa Yamaha nga motorsiklo.

Si PO2 Rutchele Jugalbot sa traffic section sa kapolisan sa maong lungsod  nga nahinabi sa Banat News miingon nga nagdagan paingon sa amihanang bahin sa lalawigan ang duha ka motorsiklo.

Matud pa ni PO2 Jugalbot nga hinay ang pagpadagan ni Villafranca  maong mi-overtake si Langhay apan nagkasingki silang duha nga nakaingon sa pagkalamba nila sa karsada.

Dugang pa ni Jugalbot nga gumikan sa kusog nga impact sa pagkalamba ngadto sa karsada nakabaton og grabeng kadaut sa lawas si Langhay kinsa patay na pag-abot sa Cortes General Hospital sa Mandaue City samtang naangol si Villafranca. (Romeo T. Limpangog/EIM)

Command Center sa Mandaue gisubhan

Dali na matubag ang mga molupyo sa kabarangayan sa dakbayan sa Mandaue sa panahon sa emerhensya  pinaagi  sa pagtawag sa numero nga 161.

Ang  maong  emergency  number  gisubhan sa   miaging adlaw  didto sa Bantay Mandaue Command Center.

Ang maong  command center  anaa gipahimutang sa kilid  sa Mandaue City Hall   nga  adunay   mga  kawani  nga  nagbantay sulod sa   24 oras. Sila  ang  mo-aninaw  sa  kadalanan ug motubag usab sa tawag  sa  mga  molupyo nga modayal  sa  161.

Si Mayor Jonas Cortes  namahayag sa mga tigbalita nga ang command center maoy   mohimo  og dinaliang tubag sa  mga  tawag  bahin  sa  sunog,  aksidente sa  sakyanan ug uban pang katalagman.

Si Eruf chairman  Dr. Eng Lim  miingon nga ang international standard alang sa pagtubag sa mga tawag nga emergency mao gayod ang singko minutos nga gidugayon.

Sa tinguha nga matubag ang dinaliang panginahanglan sa mga molupyo   ang Eruf  makiglambigit  usab  sa Bureau of Fire Protection (BFP) ug  sa mga barangay kapitan sa 27 ka barangay.

Ang pagsubo sa command center  sa miaging  adlaw  nga gipangulohan ni Mayor Cortes kadungan  usab  sa   ika -27 ka tuig nga kasaulogan sa Eruf.

Gisubhan  usab  ang    fire substation sa barangay Basak sa maong dakbayan.

Si Mandaue City Fire Marshall Ronaldo Orbeta  nagkanayon  nga  mao kini  katumanan  sa   dugay   nang pangindahay sa katawhan  nga   matubag  dayon  ang  ilang  mga  emergency call. (BANAT NEWS)