BOC-Cebu nagubot tungod sa lahugay

CEBU, Philippines - Nagkagubot ang mga kawani sa Bureau of Customs (BOC) Cebu human miluwat og kamanduan si Department of Finance Secretary Ceasar Purisima ug BOC Commissioner Ruzzano Rufino "Ruffy" Biazon sa paglahugay sa tanang opisyales sa BOC lukop nasud.

Base sa Customs Personnel Order niadtong petsa 6 ning bulana nagmando sa mga empleyado sa BOC sa pagbalik sa ilang kanhing posisyon o plantilla diin sugod Sept. 13 ngadto sa Sept. 27 ning tuiga mohatag na kini sa ilang sertipiko sa pag-asumir sa ilang kanhi posisyon ngadto sa ilang BOC - Human Resources Development  (HRD).

Gumikan niini nagkagubot ang mga empleyado sa BOC gumikan kasagaran kanila wala sa ilang orihinal nga plantilla diin dinhi sa Port of Cebu gidestino.

Nasayran sa Banat News nga dunay uban nga gumikan sa “padrino” niini nga politiko nakasulod sila sa BOC ug nindot pa og mga pwerto nga nabutangan sa BOC.

Nasuta sa Banat News nga dunay ubang empleyado nga ang orihinal nga plantilla didto sa Luzon ug Mindanao ug ang mga empleyado nga ang plantilla dinhi sa Sugbu adto nadestino sa lagyong dapit.

Si Collector Atty. Ronnie Silvestre nga maoy presidente sa kahugpungan sa mga collectors sa BOC nakigtagbo sa tanang collectors aron himoan og lakang sa pagpugong nga dili una ihinayon ang maong lahugay.

Usa sa gipaabot sa mga apektadong kawani sa BOC mao ang pagluwat sa korte og Temporary Restraining Order o TRO sa pag-implementar sa maong kamanduan. (Bong Soriano/EIM)

Natagakan sa reserbang ligid patay

Patay ang usa ka mamunitay og basura human kini aksidenteng naigo sa reserba sa ligid sa usa ka truck niadtong Biyernes sa gabii diha sa Cebu South Coastal Road habig sa barangay San Isidro, dakbayan sa Talisay.

Ang biktima giila nga si Rodulfo Cañeda, 62-anyos, residente sa sitio Pang-pang, barangay San Isidro.

Ang drayber sa Isuzu truck nga nagtangag sa plakang GVZ-781 mao si Noelyn Ubamos, 27, taga sitio Nabataan, San Carlos City, Negros Occidental.

Sa imbestigasyon sa kapolisan sa Talisay City Traffic Division nga sa wala pa mahitabo ang aksidente ang truck nagbiyahe gikan sa habagatan paingon unta ngadto sa dakbayan sa Sugbo.

Pag-abot diha sa nahitaboan ang truck giingong mi-overtake sa laing sakyanan apan tungod kay ang karsada medyo lawom kalit lang nalibkas ang lock sa reserbang ligid diha sa ilawom sa truck.

Ang nahisgutang ligid misaliring kini ug miigo ngadto kang Cañeda ug tungod sa kakusog sa impact ang biktima nakaangkon kini og grabeng kadaot sa lawas ug wala na makaabot pang buhi ngadto sa Talisay City District Hospital.

Si SPO1 Cecilio Miñoza nga nahinabi sa Banat News kagahapon nagkanayon kini nga si Ubamos wala makabantay nga natangtang ang iyang reserbang ligid ug nakaigo kini og tawo.

Usa ka lalaking nagsakay og motorsiklo nga miagi diha sa lugar mao na kini migukod kang Ubamos ug nagpahibawo sa hitabo.

Si Ubamos naapsan sa maong lalaki diha na dapit sa sitio Laray, barangay San Roque, dakbayan sa Talisay.

Ang nahisgutang drayber nagtingkagol karon sa Talisay City detention cell ug gikatakdang pasakaan og kasong reckless imprudence resulting to homicide karong adlawa diha sa piskaliya sa siyudad. (BANAT NEWS)