Konsehal sa Alayon motapon sa LP?
CEBU, Philippines - Giingong motapon sa Liberal Party (LP) ang mga konsehal sa dakbayan sa Talisay nga kaalyado sa Alayon Party apan gihimakak kini ni Konsehal Dennis Basillote.
Ang mga konsehal nga kaalyado sa Alayon Party nga gitukod ni kanhi Kongresista Eduardo Gullas, mao sila si Konsehal Basillote, Richard Francis “Choy†Aznar, Socrates Fernandez, Edward Alesna, Dorotheo Emit, Eduardoâ€Digul†Gullas III, Antonio Bacaltos Jr, ex-officio nga si Charles Basillote ug presidente sa Sangguniang Kabataan Federation (SKF) nga si Carmel John Burlas.
Samtang ang mga konsehal nga kaalyado sa LP mao lang sila si Konsehal Danny Caballero, Val Ylanan ug Aldin Diaz.
Ang presiding chairman sa konseho nga si Bise Mayor Romeo Villarante kaalyado usab sa LP.
Si Basillote kinsa usa ka last termer, mihimakak sa nahisgutang report.
Matud ni Basillote nga dili siya kinahanglang motapon ngadto sa LP tungod kay last termer na siya apan posibleng modagan siya sa taas nga posisyon sa umaabot nga piniliay.
Giklaro ni Basillote nga wala sa iyang huna-huna nga motapon sa LP tungod kay maayo ang iyang relasyon sa Alayon ug misamot sila karon og kalig-on.
Hinuon matud usab niya nga maayo ang ilang relasyon ngadto sa administrasyon karon.
Apan wala ilimod sa konsehal nga adunay mihangyo kaniya nga pabalhinon ngadto sa LP.
Sa laing bahin, si Kongresista Gerald Anthony “Samsam†Gullas Jr. sa unang distrito sa probinsiya ug apo ni kanhi kongresista Gullas nagkanayon nga walay kamatuoran ang maong report .
Matud ni Samsam nga ang Alayon dili lang kini usa ka partido kundi sama na sila sa usa ka pamilya.
Midugang si Samsam nga si Konsehal Basillote sama na usab kini nga iyang amahan diin ang mga anak niini iyang mga suod kaayo nga higala.
Gibutyag ni Samsam nga lig-on ang ilang relasyon sa Alayon diin sukad sa pagkahuman sa milabay’ng eleksiyon ang grupo kanunay kining magkita.
Ug gani niining ulahi lang nagpahigayon ang grupo og mga meeting alang sa eleksiyon sa barangay. (BANAT NEWS)
- Latest
