Calamity fund kuhaa’g panggasolina?

CEBU, Philippines - Kun wala pa’y Supplemental Budget nga maaprobahan ang Cebu City Council hangtud sa katapusan ning buwana, hayan morekomendar ang hepe sa General Services Office (GSO) sa City Hall nga adto sila mokuha og kwarta sa calamity fund aron ipalit og dugang gasolina.

Si GSO Chief Rolando Ardoza miingon nga magkinahanglan hinuon kini nga ideklarar una sa City Council nga ang dakbayan anaa ubos sa State of Calamity Preparedness aron matugotan sila nga mogamit sa calamity budget alang sa pagpalit og dugang gasolina sa mga sakyanan sa dakbayan.

Gawas sa gasolina, ang ubang gastohan nga magkinahanglan og dugang budget mao ang para ibayad sa paglabay og basura sa dakbayan didto sa pribadong landfill sa lungsod sa Consolacion.

Ang dakbayan gipagahinan og P100 ka milyon alang sa pagpalit og gasolina ug ubang petroleum products karong tuiga apan ang maong kantidad kutob ra karong katapusan sa buwan.

Matud ni Ardoza nga kun mosaylo man og gamay nga molahutay ang gasolina sa dakbayan apan sulod lang sa pipila ka adlaw sa buwan sa Oktobre. Busa  manginahanglan g’yud unta og Supplemental Budget aron isukip ang P45 milyones para ipalit og dugang gasolina.

Ang dakbayan adunay kapin sa 1,000 ka sakyanan walay labot sa mga sakyanan nga gitugyan ngadto sa kabarangayan.

Si Mayor Michael Rama wala hinuon dayon mohatag og komentaryo dihang gisukna sa Banat News kun pabor ba siya nga ang dakbayan ideklarar nga ubos sa State of Calamity Preparedness aron lang makagamit sa iyang calamity budget nga ipalit og gasolina.

Ang hepe sa Department of Public Services (DPS) nga si Dionesio Gualiza nangayo na usab og dugang P43 milyones aron gamiton pagbayad sa labayanan og mga basura sa dakbayan didto sa Consolacion.

Matag tonelada (1,000 ka kilo) nga basura nga ilabay sa dakbayan didto sa pribadong landfill sa Consolacion ang City Hall magbayad og P700 mao nga dali ra kaayo nahurot ang kapin sa P30 milyones nga budget kay matag adlaw kapin sa 300 toneladas nga basura ang mahakut ngadto sa landfill.

Gipasabot ni Ardoza nga maisip nga dakung kalamidad ang mahitabo sa dakbayan sa Sugbo kun dili na mahakut ang mga basura ug dili na makadagan ang mga patrol car sa kapolisan.

Busa maoy  hinungdan  nga  angayan gayud nga gamiton ang calamity budget.

Naglisud karon ang mga sakop sa Local Finance Committee sa pagsugyot og Supplemental Budget kay wala may bag-ong kita ang dakbayan nga wala maisip nga source of revenue sa Annual Budget.

Kun ang koleksyon sa buhis gitagana na sa Annual Budget karong tuiga dili na kini magamit sa Supplemental Budget.  (BANAT NEWS)