Mga eskuylahan mipirma'g MOA tali DSWD

CEBU, Philippines - Upat ka  mga  tulunghaan  sa Central Visayas ang  mipirma  og  Memorandum of Agreement (MOA) tali sa Department of Social Welfare and Development (DSWD)7 alang sa pagpalambo sa panginabuhi  sa  mga  kabus  nga  barangay  sa  rehiyon 7.

Gihinganlan  ni Assistant Regional Director Nemia Antipala sa DSWD7  ang  mga  tulunghaan  nga  ilang  kakumboya  nga  mao  ang  University of the Philippines Foundation (USPF), Southwestern University (SWU), St. Theresa's College (STC) ug Silliman  University sa Dumaguete City.

Ang  MOA  nga  gipirmahan  kagahapon  sa alas 11:00  pasado sa buntag didto  sa Crown Regency Hotel sa  Jones Avenue, dakbayan  sa Sugbo  nagbatbat sa kaakohan  sa matag  usa  ka tulunghaan  nga  hingtungdan.

Ang  mipirma  sa maong  kasabotan  sa bahin  sa  DSWD7 mao si  Regional Director Mercedita Jabagat  samtang sila  usab si USPF President Dr. Alicia Cabatingan  ug  SWU President Dr. Elsa Suralta  sa bahin  sa  mga  tulunghaan.

Ang  maong panagkuyog  sa DSWD  ug  sa  upat  ka  eskuylahan gitumong  aron  labing molig-on  ang  pagpatuman  sa  National Community-Driven Development Program (NCDDP)  sa rehiyon.

Tungod  kay  ang  DSWD  nagkinahanglan  og  mga  kawani  nga  sinati  ug haniti  sa gimbuhaton bahin  sa community organizing, gipasalig  sa  mga  lider  sa tulunghaang  kaabag  sa maong  proyekto nga sila  ang  mobansay  sa mga estudyante kalabot  sa maong kurso.

Miingon  si Antipala  nga  tagduha  ra ka buwan  ang  kurso  nga  community organizer  ug  karong  Oktobre  buksan  na  ang  ikaduha  nga  hut-ong  sa  mga estudyante  nga moeskuyla  niini.

Matud  pa ni Antipala  nga  mokapin  sa 700  ka  mga  community  organizer  ang  ilang  gikinahanglan  nga  ikatagkatag  sa mga  barangay  sa  Cebu, Bohol, Negros  Oriental ug Siquijor.

Ang Cebu  may 38 ka lungsod, Bohol 28, Siquijor 3, ug Negros  Oriental 1 diin  maoy  destinohan sa  mga  community  organizer  nga mograduwar sa  mga  tulunghaan  nga  kaabag sa DSWD.

Miingon  si Antipala nga  sila  maoy mopundok  sa  mga  katawhan sa matag  barangay  sa maong  mga  lungsod  ug paminawon ang   ilang  mga  suliran.

Ang mga  proyekto  nga  gituohan  nga  makahaw-as  kanila sa kakabus  maoy ipatuman   sa kagamhanan  pinaagi  sa kuwarta  nga  gikan  sa Asian  Development Bank ug sa World  Bank, sumala pa  ni  Antipala.

Ang  proyekto  nga  NCDDP  ipatuman  pagsugod  sa Enero 2014, kauban  sa 4PS ug  sa Kalapi.  (BANAT NEWS)