Mayor Cynthia Moreno di pa masuspenso
CEBU, Philippines - Dili pa masuspenso si Mayor Cynthia Moreno sa Aloguinsan tungod kay ang suspension order niini nga gikan sa Sandiganbayan wala pa madawat sa ulohang buhatan sa Department of Interior and Local Government (DILG) 7.
Kini maoy gibutyag ni Atty. Aiza Fiel Nogra ang hepe sa Operations Performance Division/Legal Officer sa DILG 7 human sa pakighinabi sa Banat News. Gipatin-aw ni Atty. Nogra ang sayop nga balita bahin sa giingong ipatuman na sa DILG ang suspension order ni Mayor Moreno.
Kini tungod kay ang opisyal nga kamandoan sa Sandiganbayan wala pa gyud maabot sa ilang ulohang buhatan.
Matud ni Nogra nga ang Sandiganbayan wala makahibalo sa bag-ong address sa ilang ulohang buhatan tungod kay mibalhin na sa laing lugar ang buhatan sa DILG central office sa Manila sulod na sa usa ka bulan. Midugang si Nogra nga miadto ang ilang abogado sa Sandiganbayan aron sa pagpahibalo sa ilang bag-ong address sukwahi sa mga nauna nga mga balita nga gikuha na sa maong abogado ang suspension order ni Mayor Cynthia Moreno.
Gitin-aw ni Nogra nga kun madawat na sa ilang ulohang buhatan ang maong suspension order ipatuman gyud nila ang maong kamandoan.
“Kun moingon sila nga go, aw go sad mi. Kun moingon sila nga stop, stop sab mi,†dugang pa ni Nogra. (BANAT NEWS)
- Latest
