MNLF, ASG ug BIFF miatake sab sa Basilan
CEBU, Philippines - Samtang nagkagubot didto sa Zamboanga City, gisulong sa mga gidudahang mga sakop sa Moro National Liberation Front (MNLF) nga giabagan sa laing grupo sa mga armadong tawo ang mga posisyon sa militar sa Basilan kagahapon.
Matud pa nga ang mga sakop sa Army Scout Rangers ug MNLF nagkaengkwentro diha sa Barangay Campo Uno sa Lamitan City, sumala pa ni Senior Superintendent Mario Dapilloza, ang direktor sa Basilan Provincial Police Office sa report sa GMA News.TV.
Tulo ka mga sundalo ang nangaangol nga giilang sila si Pfc Ruel Martinez, Pfc Wilvan Caro, ug Army Master Sgt. Ernesto Landagura.
Si Autonomous Region in Muslim Mindanao Gov. Mujiv Hataman miingon nga unom ka mga tawo ang nangaangol sa engkwentro sa Army Scout Rangers ug MNLF nga gisuportahan sa Abu Sayyaf, ug Bangsamoro Islamic Freedom Fighters (BIFF).
Ang BIFF usa ka breakaway group sa Moro Islamic Liberation Front (MILF) nga sama sa MNLF mibabag ug supak sa pakigsabot-kalinaw sa MILF ug sa gobiyerno ug sa katukoran sa Bangsamoro Framework Agreement sa Mindanao.
Wala hinuon masuta kung ang maong pag-atake may kalambigitan sa nahitabo sa Zamboanga.
Laing pag-atake usab ang gihimo sa mga rebelde diha sa Valentine Detachment sa Barangay Magcawa, Tipo-Tipo. Gibanabanang 50 ka armadong ASG ug MNLF ang misulong sa maong detachment, apan ang mga sundalo gikan sa Sitio Camalig, Bohe Paho sa Ungkaya-Pukan mipadala dayon og reinforcement sa Tipo-Tipo matud pa sa tigpamaba sa 1st Infantry Division sa Philippine Army nga si Capt. Jefferson Somera. (BANAT NEWS)
- Latest
