Inayawan Landfill kinahanglan na gyung sirad-an–Cabrera

CEBU, Philippines - Gumikan sa kadaot nga mahatag ngadto sa panglawas sa Inayawan sanitary landfill, si Konsehal Nida Cabrera mihangyo sa mayor sa syudad sa Sugbo Michael Rama nga ipatuman na ang planong pagsira sa maong dapit.

"Nihangyo ko nga i-final na ang pag close sa landfill sa Inayawan," matod ni Cabrera sa iyang privilege speech ngadto sa konseho sa miaging adlaw.

Matud pang Cabrera migawas sa gihimong chemical analysis sa University of San Carlos dunay klase-klaseng basura naay mga kuyaw ug makadaot nga toxic components sama sa mercury, lead ug cadium ang ilang nakita sa landfill.

Gibutyag ni Cabrera nga pito lang unta ka tuig ang tagal paggamit sa kinse ka ektaryang Inayawan landfill apan miabot na og kinse ka tuig gigamit gihapon kini. Ang landfill gisugdan niadtong Septiyembre 11, 1998.

Niadtong Agosto 31, 2012 sa gipahigayong inspeksyon sa Department of Environment and Natural Resources nakita nga wa mosunod sa waste segregation ang maong pasilidad.

Aduna nay giandam nga pundo gikan sa Local Development fund nga nagkantidad og P1,204,500 alang unta sa pagpasira sa landfill apan hangtod karong higayona wa gihapon napatuman.

Marso 30, 2011 dihang gimando ni Rama nga dili na palabayan og basura ang maong landfill gawas lang sa mga na-segregate nang basura ug residual wastes.

Usa ka cessation order ang gipagawas ni Rama niadtong Disyembre 10, 2011 inubanan sa direktiba nga ang tanang basura sa syudad sa Sugbo human mabuwag ang malata ug di malata dalhon didto sa pribadong landfill sa dakbayan sa Consolacion.

Apan nasayran nga wa gihapon nahunong ang operasyon gumikan kay wala pa'y closure plan si Rama.

Ang closure plan naglangkob sa paghatag og assessment sa kondisyon sa landfill ug paghatag og rekomendasyon sa proposed post-closure land use nga naglakip usab sa gikinahanglan nga physical infrastructure alang sa pagsira sa landfill.

Miapelar si Cabrera sa konseho pagpatuman og waste segregation ug karong Oktubre 9 usa ka public hearing ang gikatakdang himuon diin ang A2D Project ug USC mopakita sa ilang presentasyon sa mercury survey ngadto sa konseho. (/EIM) (BANAT NEWS)