32 Ka drayber sa Cebu city nalutsa’g warrant

CEBU, Philippines - Trayntay-dos ka mga drivers ang wanted karon human malutsi og mga bench warrants sa korte tungod sa wala nila pagtahod sa mga lagda sa trapiko ug nagmagahi pagbayad sa ilang mga multa.

Ang Cebu City Traffic Operations Management (Citom) mipasaka sa mga kaso gumikan sa mga traffic violations diha sa sala ni Judge Monalila Tecson sa Municipal Trial Court in Cities.

Matud ni Citom Operations Chief Joy Tumulak si Tecson bag-o lang mipagawas og bench warrant batok sa maong mga drayber.

Nasayran nga nagkantidad og P1.6 milyones ang tanang pending penalties sa maong 32 ka mga drayber nga kinahanglan nilang bayran.

“Thirty-two drivers ang among gipangita karon, lain-lain na route sa Cebu City and outside Cebu,” matud ni Tumulak.

Matud ni Tumulak nga dunay mga drivers nga dagko ang nahimong violations gumikan sa paglapas sa City Ordinance 801 Traffic Code.

Sama na lamang sa usa ka driver (tinuod nga pangan gipug-an) nga dunay 350 violations ug dunay penalty nga P139,000.

Matud niTumulak nga sukad pa 1999 hangtod karon ang violations ug upat pa ang napasaka ngadto sa korte.

Si Tumulak miesplikar nga dunay mga kaso nga kaniadto pa nahitabo apan bisan sa kadugayon karon lamang nahatagan og pagtagad tungod sa kadaghan sa mga violators.

“Di gyud ma ato tungod sa kadaghan sa mga violators, kay everday 50 ang case I file ngadto sa fiscal,” pasabot pang Tumulak.

Matud usab ni Tumulak nga ang mga traffic violations nga nahimo sa 32 ka drivers naglakip sa no stopping, disregarding traffic sign ug no I.D.

Aduna sab usa ka motorista nga taga Cebu City nga nalutsan og bench warrant gumikan wa nagsul-ob og helmet. “Hangyo sa atong mga kaigsuonan dili lang sa jeepney drivers apil usab ang mga private drivers nga kun pananglitan makadawat og citation tickets dili ibalewala kay ang Citom ug City legal seryoso mo-file og kaso sa mga traffic violators,” matud ni Tumulak.

Mihangyo usab si Tumulak nga kinahanglan i-settle dayon sa mga drayber kung duna silay mga citation tickets ug bayran ang compromise penalty nga P500 aron di na moabot pa sa korte.  (BANAT NEWS)