Ulitawo gipatay sa COrdova

CEBU, Philippines - Namatay  ang  usa  ka  ulitawo  human  pusila  sa wala  hiilhing  kriminal  didto  sa sitio Nangka sa barangay Day-as sa lungsod sa Cordova  sa miaging  Martes  sa alas 2:00 pasado ang takna sa kaadlawon.

Ang  biktima  mao si Alex Magabon Agbo, 25, ulitawo nga taga barangay Babag II, dakbayan sa Lapulapu.

Si PO2  Harvey Ytang sa kapolisan sa maong lungsod nga nahinabi sa Banat News miingon wala hiilhing mga tawo ang nagpusil patay sa biktima.

Bisan  ang  mga molupyo sa maong dapit nahigmata  dihang ilang nadungog ang mga buto-buto  sa armas.

Dugang pa ni PO2 Ytang nga naalarma usab sila sa maong mga buto sa armas nga maoy hinungdan nga dali nila  kining   gisusi. Didto  sa   dapit  nga  gigikanan  sa  mga  buto ilang  napalgan  ang  biktima  nga  patay  na  nga  nagbuy-od  sa yuta.

Si PO2 Ytang miingon nga dihang ilang gisusi ang patay’ng lawas sa biktima, ilang nasuta nga nabulit  sa mga  samad  sa bala  ang  lawas  niini.

Napalgan  usab  sa kapolisan  ang  unom ka  kabhang sa bala nga kalibre .45  ug usa ka lumping  nga  bala  nga ilang gituohan nga gikan  sa armas sa mamumuno.

Padayon  pa nga  gipanid-an  sa kapolisan  kun si kinsa  ang   kriminal. (BANAT NEWS)