13 ka batang na-rescue di pa makauli sa ilaha

CEBU, Philippines - Trese ka mga batang na-rescue gikan sa cyber pornography sa Cordova nagpadayong gipailawom sa psycho-social debriefing ug dili pa mahimong papaulion ngadto sa ilang mga panimalay.

Ang Department of Social Welfare and Development (DSWD)- 7 social welfare officer nga si Rosamarie Salazar sa report sa “Sayri” sa CCTN Channel 47 mibutyag nga taas pa kaayo ang proseso nga agian ang mga bata.

Hinuon gipasalig niini nga maayo ang kahimtang sa 13 ka mga  bata nga ilang na-rescue sa miaging semana ug mi-kooperar  sila sa ilang gihimo nga mga interviews ug intervention.

Sumala pa ni Salazar nga lakip sa ilang gi-assess ang kahimtang sa mga bata ug sa ilang mga ginikanan kung mabalik na ba gyud ang ilang normal nga kinabuhi.

Samtang giklaro ni Salazar nga hapsay ug sa saktong paagi ang ilang pagluwas sa mga bata niadtong milabay’ng semana.

Wala hinuon gidid-an ang mga kabanay sa mga bata nga maduaw sila sa ilang gikahimutangan karon. (BANAT NEWS)