Maestra sa estudyanteng namatay mag-atubang og kaso

CEBU, Philippines - Hayan nga mag-atubang og kaso ang mga magtutudlo nga  kauban sa mga tinun-an sa Sabang National High School dihang namatay  ang  usa ka estudyante   kay naigo ang ulo sa  socker goal  didto  sa Ramon Durano Sr. Sports Complex sa dakbayan  sa Danao.

Ang  socker goal ginama sa mga material nga puthaw nga tubo nga may  4 pulgada ang gidak-on ug 16 ka tiil ang gitas-on.

Si  PO1 Genrec Gabutan sa kapolisan sa dakbayan sa Danao  miingon nga nagpaabot sila sa mga ginikanan sa biktima aron  sa pagsang-at og reklamo.

Giila ni PO1 Gabutan ang biktima nga mao  si Almark Penas, 14 , nga taga sitio Santo Niño sa barangay Looc, dakbayan sa Danao ug tinun-an sa Grade VII sa Sabang National High School.

Ang mga magtutudlo nga kauban sa mga tinun-an mao sila si Miss Nonet,  Miss Gica, Miss Maricel Jayme, Miss Marilyn Luna ug Miss Juceel Tampus nga pulos hingkod ang panuigon.

Si PO1 Gabutan miingon nga  sa alas 8:00 pasado  sa buntag  sa miaging Lunes  kuyog sa mga tinun-an ang upat ka mga magtutudlo  sa tuyo nga mag-praktis kini sa Karansa Festival,

kini  alang  sa ilang  pagpangandam sa tinuig nga pangilin sa maong dakbayan.

Dugang pa niya nga ang  kasong reckless imprudence resulting to homicide maoy kasong atubangon sa mga magtutudlo nga hingtungdan kun moreklamo  ang mga ginikanan sa namatay.

Matud pa ni PO1 Gabutan nga samtang nagpaabot sa ilang praktis ang upat ka mga bata nga tinun-an  nagkalingaw usab sa pagkapyot sa socker goal apan ang biktima unang miambak ug nag-ayo sa natangtang nga liston sa iyang sapatos.

Samtang nagduko ang biktima nga nagbalighot sa liston sa iyang sapatos nangapyot usab  ang tulo ka mga tinun-an nga nagpanuigon og 15 ngadto sa 16 hangtod nga  natumba ug naigo ang ulo sa biktima.

Dugang pa ni PO1 Gabutan nga dali unta nga gihatud sa mga magtutudlo ang biktima ngadto sa Danao Provincial Hospital apan gideklarar kini sa mga doktor nga namatay. (BANAT NEWS)