Anti-pork rally unya gabii sa Fuente

CEBU, Philippines - Inay nga sa Plaza Independencia, madayon gyud sa orihinal nga giplanong venue ang anti-pork barrel rally nga ipahigayon karong gabii nga magsugod alas 6 adto sa Fuente Osmeña Rotunda.

Nunot niini, ang City Traffic Operations Management (CITOM) pinaagi sa executive director niini Atty. Rafael Christopher Yap nagpahibalo nga gilauman ang huot nga dagan sa trapiko sa dalan nga nagpalibot sa Rotunda.

“Our advice to motorists is to anticipate heavy traffic. Being a Redemptorist novena day, we expect this to exacerbate traffic. But we will have people to help those who cross the circle. Strictly no parking around the rotunda and we will implement existing pay parking areas,” si Yap namahayag.

Dunay 25 ka mga CITOM personnel nga i-deploy palibot sa Fuente aron sa pag-atiman sa dagan sa trapiko ingon man sa mga tawo nga molabang pasulod ug pagawas sa rotunda.

Kini matud pa human sa pulong kagahapon tali sa organizers ug mga opisyal sa Cebu City government diin ang nagpailang usa sa mga naghan-ay sa protest rally nga si Abbie Canturias.

Matud ni CITOM operations head Joy Tumulak, sila gipasabot ni Canturias nga dili na mamahimong bakwion ang ilang unang pag-anunsyo nga sa Fuente ipahigayon ang rally.

Dugang ni Tumulak, wala’y special parking areas nga gitagana ang CITOM alang niadtong sumasalmot gawas sa B. Rodriguez partikular sa atubangang bahin sa Vicente Sotto Memorial Medical Center.

Gikatakda nga 3,000 ngadto na sa 5,000 ang mutambong sa protest rally nga nanawagan sa pagwagtang sa pork barrel.

Pasabot ni Tumulak, bisan tuod wala sila’y planong sirad-an ang dalan libot Fuente sama sa gustong mahitabo sa mga organizers, ilang susihon karong gabii kung angay ba kining buhaton sa higayon nga modaghan na ang partisipante.

Ang labing unang rally gipahigayon Agosto 26 didto sa Plaza Independencia diin laing grupo ang nangulo niini. (BANAT NEWS)