Mahuyang nasakpan sa akto nga nangawat priso

CEBU, Philippines - Nasikop ang usa ka mahuyang human hisakpi sa akto sa tag-iya sa balay nga  iyang gilungkab  sa Ponce II, barangay Carreta, sa dakbayan sa Sugbo kagahapon sa alas 4:00 sa kaadlawon.

Ang suspetsado nailhan nga si Michael Gascon Ligan, 23 , ug nagpuyo sa Ponce II, usa  ka giingong  mahuyang.

Samtang ang biktima naila nga si Joselito Hucamis Catipay, 46, minyo, nagpuyo usab  sa maong  lugar.

Matud pa ni Inspector William Alicaba, hepe sa TRS dihang nahinabi sa Banat News nga nakit-an ang suspetsado sa anak ni Catipay nga mikatkat sa ilang balay  mga alas 3:00 sa kaadlawon.

Dugang pa ni Insp. Alicaba nga dali rang masulod ang maong balay kay under construction pa man kini. Nakuha sa suspetsado ang nagkalain-laing cell phone, relo, silver nga alahas,   ug mp3 nga mokabat sa P20 mil.

Dihang nahinabi sa Banat News  ang suspetsado nagpatulo kini sa iyang luha ug miingon nga wala gyud siya manglungkab.

Mibahad pa kini nga kun mapriso siya ibusdak niya sa semento ang ulo sa iyang kauban.

Apan matud pa ni  Insp. Alicaba ang kauban sa suspetsado walay labot sa maong kaso kay  kini ra  maoy  nagbinugtong  sa pagpangawat.

Gikataho nga bag-o lang nakagawas gikan sa prisohan ang maong suspetsado tungod sa kasong theft apan karon mag-atubang na usab kini sa kasong robbery nga ipasaka sa kapolisan batok kaniya.  (/WC)  (BANAT NEWS)