Gipareglahan og pusil angol

CEBU, Philippines - Naangol ang   usa  ka  lalaki  human  kini  pusila  sa wala  hiilhing  mga  kriminal kinsa  miingon  nga  miparegla  kaniya  didto sa Saac 1, barangay Buaya, dakbayan sa Lapulapu   sa miaging  kaadlawon.

Ang biktima mao si James Beredo Pandaon, 20, ulitawo,  nga taga sitio Pu-ol, barangay Bankal, dakbayan sa Lapulapu.

Ang   nagpusil mao ang duha ka wala hiilhing lalaki nga  nagsakay og motorsiklo.

Si PO1 Jade Querobin sa homicide section sa kapolisan sa maong dakbayan nga nahinabi sa Banat News miingon nga naglakaw pauli sa ilang panimalay ang biktima dihang gisundan kini sa mga suspetsado ug kalit lang nga   gipusil.

Dugang pa niya nga mitakingking ang biktima bisan human   naigo sa bagtak.

Nakadagan  kini  ug  nakapasalipod sa   mga  balay sa maong dapit hinungdan  nga  gibiyaan  siya  sa  mga kriminal  ug  wala  na  tiwasi.

Ang biktima  dali nga gihatod  ngadto sa Lapulapu City Hospital  apan gibalhin  ngadto sa Vicente Sotto Memorial Medical Center sa dakbayan sa Sugbo.      

Si PO1 Querobin miingon nga nagtuo sila nga gikasuyaan lang ang biktima sa pagsayaw niini sa disco nga gipahigayon maoy hinungdan nga gipareglahan kini sa pagpaingon na pauli sa ilang panimalay. (/WC) (BANAT NEWS)