PDEA-7 ilahugay, direktor ug mga sakop apil sa ibalhin
CEBU, Philippines - Ang Philippine Drug Enforcement Agency kon PDEA-7 nalakip sa gimandong maglahugay nga naglakip sa regional director sa Central Visayas nga si Julius Navales ug 20 niya ka mga sakop sugod karong bulan sa Septembre ning tuiga.
Sigon sa report nga si Navales ug kaubanan ibalhin ngadto sa Luzon ug Mindanao area.
Walay gibutyag nga rason sa paglahugay sa maong buhatan apan usa sa gitan-aw mao ang promosyon sa mga opisyal ug mga sakop niini.
Nasayran nga si Navales nilingkod isip director sa PDEA sa Central Visayas niadtong niaging tuig hulip ni director Jigger Montellana nga nadestino sa PDEA National Headquarter isip Deputy Chief of Personnel Division.
Sama kang Montellana gikatahong adto usab ibalhin si Navales sa PDEA National Headquarters. Si Navales hulipan ni Lyndon Aspacio nga gipaabot nga moasumer sa iyang bag-ong katungdanan sulod niining semanaha.
Gikataho usab nga naapektahan sa maong lahugay ang pipila ka iladong mga miyembro sa PDEA nga naglakip nila ni Earl Rallos nga gidestino sa Regional 4-B, Jason Cabatania nga gi-assign usab didto sa Baguio ug si Jessie Tabano nga i-destino sa Caraga region. (/EIM) (BANAT NEWS)
- Latest
