CENTCOM alerto tungod sa pag-atake sa Zamboanga

CEBU, Philippines - Ang Central Command- Armed Forces of the Philippines mihingusog karon sa ilang intelligence monitoring ilabi na sa kabaybayunan sa tibuok Central Visayas human sa nahitabong kagubot sa Zamboanga City tali sa Moro National Liberation Front (MNLF) ug sa military.

Si Centcom Commander, MGen. Roy Deveraturda mihatag na og direktiba pinaagi kang spokesman, Lt. Jim Alagao, nga ang Centcom personnel kinahanglang magbinantayun ilabi na sa pagmonitor sa coastal barangays.

“Most probably mag-bangca sila as they are not allowed to board a plane and shipping lines para kung magtabok-tabok sila dili sila dali madakpan,” matud ni Alagao.

Ang Central Command naniguradong luwas ang tibuok rehiyon aron malikayan ang susamang insidente sa Mindanao.

“It could be via Siquijor or Negros Oriental depende yan and we have to prevent ari exit sa Central Visayas,” matud niya. Gibana-bana nga 100 ka mga gituohang miyembro sa MNLF ang misulong sa mga barangay sa Sta. Barbara, Sta. Catalina, Rio Hondo, Mariki, ug parte sa Talontalon sa Zamboanga City kagahapon sa buntag.

Unom na ang natala nga patay ug 24 ang nasamdan kagahapon. Matud pa nga mokabat sa 20 ka mga tawo ang gi-hostage ug dunay 200 ka mga na-stranded nga mga sibilyan tungod sa binakbakay. “As far as we know the Mosque where the hostages were held was cordoned by our troops and nag-convene na din ang crisis committee sa city,” matud ni Alagao.

Si Alagao miawhag sa tanang anaa manimuyo sa coastal barangays nga magmabinantayon kanunay sa ilang palibot ug i-report dayon kung dunay makit-ang kadudahang mga tawo sa ilang mga dapit.( /EIM)  (BANAT NEWS)