Mga antique balor og P50 mil gikawat

CEBU, Philippines - Mikabat  sa P50 mil ang  balor  sa mga antique  nga  nasakiyo  sa wala  hiilhing  mga  kawatan  didto  sa usa  ka balay  sa sitio Nasipit, barangay Talamban , dakbayan sa Sugbo kagahapon sa kaadlawon.

Si PO2 Renaldo Labating sa Theft and Robbery Section nga nahinabi sa Banat News miingon nga ang biktima mao si Marlyn Lu, hingkod ug lumulupyo sa Nisipit, Talamban.

Ang desk officer sa Talamban Police nga si PO1 Joel Vergara,  nga nahinabi sa Banat News miingon nga mga alas 8:00 nila nadawat ang maong alarma busa dali silang nakig-alayon sa Crime Scene Investigation, Criminal Investigation Branch aron sa pag-imbistigar sa maong insidente.

Mitug-an si Vergara nga mga walo ka mga antique nga figurine ang nakuha sa mga wa pa mailhing suspetsado nga mobalor og P50 mil.

Sumala pa ni Vergara nga giguba  sa mga kawatan  ang pultahan sa tuong bahin sa balay ug milusot kini sa living room diin didto nahimutang ang mga figurine.

Samtang giimbistigar ang security guard nga si Lecson Torrifil sa TRS kinsa  miangkon  nga nakatulog siya sa mga ala 1:00 ang  takna  ug nakamata siya sa alas 2:00 sa kaadlawon.

Matud pa ni PO2  Labating nga padayon pa ang imbistigasyon nga gipahigayon sa Talamban Police Station ug ilang susihon nganong nakawatan pa gyud kining balaya nga aduna may duha ka security guard nga nagbantay niini.

Gawas pa nga dunay duha ka mga security guard gikataho nga wala gyud makapaghot ang mga iro nga naa sa balay. Gibana-bana nga nahitabo ang pagpanglungkab sa mga alas 12:00 hangtod sa alas 4:00 sa kaadlawon diin maayong pagkahinanok sa mga nagpuyo sa maong balay. (BANAT NEWS)