70 ang misalmot sa leadership training
CEBU, Philippines - Dul-an sa 70 ka tawo nga taga syudad sa Carcar ug mga lungsod sa Asturias ug Liloan sa Sugbo misalmot sa leadership training workshop sa Ramon Aboitiz Foundation Inc. (RAFI).
Ang maong kalihokan inubanan sa Kool Adventure Camp (KAC) sa RAFI gitumong sa pagpausbaw sa abilidad ug kalidad sa tawo nga mahimong epektibong lider sa ilang tunghaan.
Matud pa ni Deputy Director for Youth Development Program Marie Sol Gonzalvo sa RAFI-KAC, nga ang mga magtutudlo nakasulay sa multi-challenge adventure nga naglangkob sa mga aktibidad pagpalambo sa kolaborasyon, critical thinking, epektibong komunikasyon ug consensus building.
Samtang matud pa usab ni Tanya Amanda Flores, program officer sa EQUIP-CEBU nga tuyo nila nga makahatag og bansay-bansay nga epektibo sa mga lider sa tunghaan.
Sa samang higayon makabaton sila og dugang kaalam nga gikinahanglan sa pag-atubang sa mga nagkalain-laing kasinatian isip lider sulod sa tunghaan.
Dugang pa ni Flores nga kining maong pagbansay-bansay dili kini kasagaran nga ilang gihimo sanglit aduna man usab sila’y pagabuhaton nga ubang mga aktibidad.
Gipasabot ni Gonzalvo nga ang EQUIP-CEBU usa ka programa ubos sa edukasyon nga gipunting sa RAFI aron molambo ang kalidad sa edukasyon pinaagi sa pagpausbaw sa kapasidad sa mga magpapatigayon nga modumala sa ilang tunghaan. (/WC) (BANAT NEWS)
- Latest
