DENR7 mipaila sa usa ka libro niini
CEBU, Philippines - Ang Department of Environment and Natural Resources sa Central Visayas (DENR-7) milusad sa 56-page coffee table nga libro nga nag-ulohan og “Pursuing Excellence in Environmental Governance†nga gipahigayon didto sa Cebu Grand Hotel sa dakbayan sa Sugbo.
Sumala pa ni DENR-7 Regional Executive Director Dr. Isabelo Montejo nga ang maong libro naghulagway sa tanang unod sa mga buluhaton nila sa ilang departamento subay sa ilang rehiyonal nga misyon.
Sa maong libro gitug-an niini ang ilang lima ka mahinungdanon kaayong tuyo alang sa gitawag nga biodiversity conservation, community based forest management, equitable land management, responsible mining and clean environment,†matud pa ni Montejo.
Dugang pa niya nga tumong sa maong libro nga mailhan sa katawhang mobasa sa libro, ang ilang mga nakab-ot nga kalampusan sa Central Visayas sulod sa ilang buhatan ug usab mapausbaw ang mga nag-unang mga programa niini.
Gipanghinaut ni Montejo nga unta madani ang mga mobasa pinaagi sa pagsalmot sa ilang mga nagkalain-laing aktibidad nga may kalabotan sa pagpakabana sa kalikopan.
Samtang sa bahin ni Mines and Geosciences Bureau (MGB-7) Regional Director Loreto Alburo, iyang gipahayag nga ang maong libro nagpakita sa kahimsog sa panag-alayon sa buhatan sa DENR-7 ug sa nagkadaiyang mga magpapatigayon.
Dugang pa ni Alburo nga kini nagpakita sa mahinungdanong mga nakab-ot sa maong buhatan ug lakip na ang kalig-on sa teamwork niini sa pagkab-ot sa mga nag-unang programa ni DENR Secretary Ramon Paje partikular na ang kalabot sa geohazard mapping ug assessment ug ang National Greening Program (NGP).
Mikapin sa 40 ang misalmot sa maong kalihokan tungod kay ilang gisaksihan ang maong libro nga unang napalambo ug gipublikar sa rehiyonal nga buhatan sa DENR. (/WC) (BANAT NEWS)
- Latest
