Birthday ni Don Sergio Osmeña karon

CEBU, Philippines - Ang katawhan sa tibuok Sugbo karong adlawa magsaulog sa ika-135 ka tuig nga sumad sa pagkatawo ni Don Sergio Osmeña Sr., ang bugtong Sugboanon nga nahimong presidente sa Pilipinas.

Natawo si Don Sergio kaniadtong Septiyembre 9, 1878  sa karaan nila nga balay kaniadto sa eskina Osmeña Boulevard ug Lapulapu Street.

Namatay si Don Sergio sa pangedaron nga 83 kaniadtong Oktubre 19, 1961.

Karong buntag adunay ipahigayong “flower offering” sa mga opisyal ug representante sa lainlaing ahensya sa kagamhanan ug kahugpongan  sa dapit nga natawhan ni Don Sergio.

Si Don Sergio nga apohan ni kanhi mayor Tomas Osmeña una nga nagsilbi nga vice president sa nasud gikan sa tuig 1935 ngadto sa 1941, dayon gikan sa 1941 ngadto sa 1944. Mibanos siya isip presidente sa nasud kaniadtong Agosto 1, 1944 ngadto sa Mayo 28, 1946.

Nakahuman si Don Sergio sa pagka- abogado ug mipasar sa Bar kaniadtong 1903.

Nahimo kaniadto si Don Sergio nga staff ni General Emilio Aguinaldo isip courier ug journalist kay bisan og wala pa siya mahimong abogado gimugna ni Don Sergio ang El Nuevo Dia, usa ka mantalaan kaniadtong tuig 1900 ug siya maoy editor.

Pagka 1904, si Don Sergio nahimong labing batan-on nga gobernador sa Sugbo sulod sa tulo ka tuig kay misalmot man siya isip magbabalaud.

Nahimong Speaker si Don Sergio didto sa Philippine Assembly ug mitabang ni Presidente Manuel Quezon pagmugna sa Nacionalista Party aron pagbuntog sa kahugpongan sa mga politiko nga taga Manila nga gitawag og Federalista Party.

Usa sa mga sakop sa banay’ng Osmeña ang gitahasan nga mobatbat sa kaagi ni Don Sergio atul sa yano nga kalihukan karong buntag  sa dapit niya nga natawhan.

Sanglit wala dinhi sa Sugbo si mayor Michael Rama, si Vice Mayor Edgardo Labella maoy mangulo sa mga opisyal sa dakbayan nga mohandom sa daghang nahimo ni Don Sergio kaniadto. (BANAT NEWS)