Barko miabot na aron pagsuyop sa asayte sa MV St. Thomas Aquinas

CEBU, Philippines - Sugdan  na ugma  ang  pagpasuyop  sa nahibiling  asayte  ug  krudo  sa  MV St. Thomas  Aquinas  sa  ilawom  sa kadagatan  sa Talisay.

Kini  human  modunggo  sa  dakbayan  sa Sugbo  ang barko  nga   gitawag  nga  Trabajador 1 sayo  sa buntag  niadtong Sabado. Usa  sa tuyo   niini  mao  nga  maproteksyonan  ang  kadagatan  ug  ang  mga may  kinabuhi  ilawom  sa  dagat  sa lalawigan  sa Sugbo.

Gipadagan  ubos  sa superbisyon  sa  Nippon Salvage ug  Malayan Towage nga  mga  kompaniya, ang  Trabajador 1  nagkarga  og  espesyal  nga  ekipo  gikan  sa   Japan nga  epektibo  kaayo  nga  mosuyop  sa asayte. Ang  ubang  mga  makinarya  nga  dala  niini  mao  ang  usa  ka  barge nga  may  ngalang  'Maria Bnr Delia 1'  nga  nagkarga  og  12   ka  mga  tangke  nga  kasudlan  sa mahabwa  nga  asayte  ug  krudo.

Ang  matag  tangke  igo  nga  kasudlan  og  tag  16 kilo litro   sa asayte. Kompleto  usab  kini  og  usa  ka  special diving equipment nga  moabag  sa  mga  mananawom   nga  motidlom  ngadto  sa  50 metros   ilawom  sa dagat  sulod  sa  pipila  ka  takna. Nasuta  nga  ang  MV St. Thomas Aquinas anaa  naglubog  mga  50 metros ilawom  sa  dagat  sa Talisay.

Sa ilang  pag-abot  ang  mga  tripolante nagsugod  dayon  sa  pagpangandam  alang  sa  trabaho  niini  sa pagsuyop  sa sa asayte  sa barko. (BANAT NEWS)