Talisay mokita na sa ilang fish port
CEBU, Philippines - Ang dakbayan sa Talisay makabaton na unya og dugang abot gikan sa fish port sa barangay Tanke nga himoong agianan sa mga opisyal ug tripolante sa US Navy sa ilang himoon nga community service dinhi sa Sugbo.
Sa milabay’ng semana ang Glenn Defense Marine (Asia) PTE. LTD. nananghid sa kagamhanan sa siyudad nga mogamit sa fish port nga maoy agianan sa US Navy officers ug crew.
Ang Glenn Defense Marine usa ka civilian contractor nga maoy mohatud ug mokuha sa mga Navy officer ug crew gikan sa ilang barko nga mopundo sa lawod.
Kasagaran sa mga barko sa US Navy mopundo sa Talisay ug ang ilang mga opisyal ug tripolante nga motuman sa community service sa Talisay hakuton sa gagmay nga sakyanan sa dagat nga ilang gikontrata.
Sa milabay’ng semana si Konsehal Richard Francis “Choy†Aznar mipalabang og resolusyon sa paghatag og pagtugot kang Mayor Johnny De los Reyes nga mogama og Memorandum of Agreement (MOA) tali sa Glenn Defense Marine.
Matud ni Aznar nga ang US Navy ship gitakdang modunggo sa kadagatan sa Talisay alang sa nahisgutang katuyoan.
Ang nahisgutang contractor nananghid sa kagamhanan sa siyudad nga ang ilang mga sakyanan nga mohakot sa mga opisyal ug tripolante anha modunggo sa fish port ug mobayad sa siyudad sa ilang paggamit sa maong fish port.
Sa laing bahin, si Vincie Monterde, public information officer (PIO) sa siyudad nagkanayon nga ang siyudad makabaton na unya og dugang abot kung masugdan na ang operasyon sa fish port. (BANAT NEWS)
- Latest















