Pari ‘nanghapak’ sa laing pari

CEBU, Philippines - Nasagmuyo ang usa ka pamilya batok sa ilang kura paroko human sa giingong pagbastos niini sa pari nga ilang giimbitar aron maoy mohimo sa Santos nga Misa sa haya sa ilang mitaliwang mahal sa kinabuhi niadtong Biyernes sa gabii.

Ang insidente nahitabo diha sa barangay Poblacion sa lungsod sa Asturias diin gihaya ang usa ka minatay sa pamilyang Toong.

Matud pa sa nakasaksi sa hitabo nga si Rusto Toong, anak sa namatay, nga daw nabastos ang haya sa ilang amahan tungod sa gipakitang taras sa ilang kura paroko sa lungsod nga si Fr. Virgilio Paras. Sumala pa ni Toong, ang kura sa barangay Sta. Lucia sa samang lungsod  nga si Fr. Renato Gamorot maoy ilang giimbitar aron maoy mo-misa sa haya sa ilang amahan niadtong gabhiuna.

“Nagyawyaw siya (Paras) unya suko kaayo siya sa pari (Fr. Gamorot) kay wala mananghid,” matud pa ni Toong sa Banat News.

Sumala pa ni Toong nga sa pagkanaog palang sa iyang sakyanan, nagyawyaw na si Fr. Paras  hangtud sa pagsaka niini sa taas sa ilang balay ug didto giingong nagyayaw tungod sa wala pagpananghid kaniya.

Matud pa nga sud sa 40- minutos ang pagsige og yawyaw sa maong pari usa pa kini milakaw.  Dihang nahinabi sa Banat News si Liza Toong ang asawa sa namatay, miingon kini nga pag-abot ni Fr. Paras sa ilahang balay gisugat niya kini ug nangayo siya og pasaylo ug mihangyo siya nga dili kasab-an si Fr. Gamorot kay wala kini sala.

“Mikalit ra man na siya og ari diri, ako na siyang gisugat, nagyawyaw man na siya nga di daw maayo iyang gibuhat (wa pagpananghid ni Fr. Gamorot),” matud ni Liza Toong.

Matud pa ni Liza nakurat nalang siya nga nagpiti-piti na ang bukton ni Fr. Gamorot ug sa iyang paglingi gihapak-hapak diay kini ni Fr. Paras sa makadaghang higayon.

“Nagpiti-piti na man, gihapak man na niya sa buko-buko hangtod sa gawas,” dugang pa ni Liza Toong. Ang mga parokyano nga nakakita sa gibuhat ni Paras nakugang ug wala dayon makatingog. “Naka-ingon ang mga tawo nga nagbilar nga way batasan pagkaparia,” asoy pa ni Liza.

Si Fr. Gamorot nga gikahinabi sa Banat News miangkon nga nasayop siya nga wala makapananghid nga personal kang Fr. Paras tungod kay nagdahom gyud siyang gipananghid na sa tagtungod ang imbitasyon kaniya.

 â€œNakalitan gyud ko sa mga panghitabo. Pero nikalma lang sad ko, sa akong bahin nakalitan ko kay di maayo. Wala lang ko nisukol. Nalain gyud to siya. Na-insulto siguro siya. Maong nagpaubos ko kay parehas ming padre kura. Gitan-aw nako siya isip akong igsoon nga pari. Kauban mi sa pagpangalagad sa Ginoo. Pero kusog-kusog gyud ‘to iyang pagpanghapak nako,” dugang pa niya. Matud niya posibleng nadala lang sa emosyon si Fr. Paras.

“Ako lang sang giampo nga makaamgo siya, kahibalo ko di to niya tinuyuan, nadala lang siya sa emosyon. Katong hitabo kausa ra man to. Wa man ko nagtuo nga mao ‘toy mahitabo. In good faith ug Diniyos lang gyud to akong pagmisa, wala koy laing gihunahuna,” matud pa ni Gamorot.

Sukad sa maong hitabo, wala na magkita pag-usab si Gamorot ug si Paras, apan andam si Gamorot nga makigstorya ni Paras. 

Nagplano ang mga parokyano ni Fr. Paras nga moadto sa palasyo sa cardinal aron sa pagtaho ngadto ni Archbishop Jose Palma sa maong insidente karong adlawa.Dihang gisultihan si Gamorot sa plano sa parokyano, mao kini ang iyang ingun: “Wala koy mahimo sa ilang buhaton, paabot lang pud ko ni Archbishop Palma kung unsa iyang ikasulti. Kay ako usab, plano ko mobisita ni Archbishop Palma aron makadungog pud siya mismo sa akong side.”

Si Monsignor Achilles Binghay, ang Episcopal vicar sa Archdiocese of Cebu sa pakighinabi sa Banat News miingon nga “general rule” gyud nga magpahibalo sa kura paroko sa maong lugar ang pari nga dili taga dinha nga siya mopahigayon og seremonyas sa simbahan.

“There’s a general rule, basta dili iyang sakop. Mananghid gyud ni sa kura paroko sa maong lugar,” matud ni Binghay. Apan matud ni Binghay, kung kausa lang momisa, mo-consider lang unta ang kura paroko ug dili kini rason sa pag-away.

“Makahimo ta pagkorehir, in a proper way. Ang mga tawo, boss man sa pari, ang pari maoy gitugyanan sa pag- alagad sa mga tawo. Kinahanglan morespetar sad kami sa mga tawo nga among gisilbihan. Maka-correct mi, makabadlong mi in proper courtesy,” niya pa.

“The priest should be the first one to be courteous para ang civilian mo-show sad og courtesy. Bisan pari pa, mohatag og due respect, bisan sayop hatagan pud og due respect ang mga tawo nga nasayop,” dugang pa ni Binghay.

Gisuwayan pagkuha sa Banat News og habig si Fr. Paras apan wala tubaga ang tawag niini sa telepono. (BANAT NEWS)